Fyrsta veggspjaldið af Íslandsmynd Tom Cruise komið á netið

Fyrsta vísbendingin um útlit kvikmyndarinnar Oblivion er komin, en það er veggspjald sem finna má á Facebook-síðu True North kvikmyndafyrirtækisins.

Eins og kunnugt er þá var kvikmyndin tekin að stórum hluta upp hér á landi en með aðalhlutverkið fer sjálfur Tom Cruise. Með önnur hlutverk fara meðal annars Morgan Freeman og bondstúlkan Olga Kurylenko.

Þetta er semsagt stórmynd á Hollywood kvarðanum.

Eins og sést á veggspjaldinu þá má finna ákveðin líkindi við íslenska náttúru, þó íslenskur arkitektúr sé kannski ekki jafn frumlegur og sést á myndinni.

Söguþráður myndarinnar, eins og hann kemur fyrir á heimasíðu Rotten-tomatoes, er sá að hermaður er sendur til fjarlægrar plánetu þar sem hann á að drepa alla eftirlifandi af stofni geimvera. Hann hittir ferðalang á plánetunni sem breytir sýn hans á leiðangurinn.

Fyrirhugað er að myndin verði frumsýnd í apríl á næsta ári, og má þá búast við að heimsbyggðin kynnist Íslandi enn frekar.