Jól á ströndinni í L.A.

„Ég var að ganga berfættur með syni mínum á ströndinni um daginn í glampandi sól og rakst þá á hús í spænskum stíl sem var alþakið jólaskreytingum á ameríska mátann og með pálmatré allt í kring. Það var bara eitthvað svo rangt við það," segir leikstjórinn Óskar Þór Axelsson sem er búsettur í Los Angeles og heldur jólin þar.

Þetta er ekki í fyrsta skipti sem Óskar heldur jólin utan Íslands en hann var búsettur í New York í átta ár. „Þetta er samt í fyrsta skipti sem ég held jólin með fjölskyldunni á strönd og það er að ýmsu leyti hálfsúrrealískt. Ég er því ekki kominn í neitt jólaskap enn þá," segir hann og hlær. Hann býst þó við að það gæti breyst um helgina þegar bróðir hans kemur með fjölskylduna sína til að verja með þeim jólunum í sólinni. „Þá fer ég líka í frí svo vonandi fylgir jólaskapið með því öllu saman," segir hann. Óskar býr úti með konu sinni, Huldu Þórisdóttur, og börnum þeirra tveimur, Valtý og Unni. Fjölskyldan hefur ákveðið að halda jólin á amerískan máta þetta árið og ætla að opna gjafirnar á jóladagsmorgun. Íslenski hamborgarhryggurinn, hangikjötið og rjúpan verða látin eiga sig þetta árið og á borðum verða alls kyns alþjóðlegir smáréttir.

Óskar fluttist tímabundið með fjölskylduna í sólarríkið í september síðastliðnum til að fylgja eftir myndinni Svartur á leik. Myndin hefur vakið mikla athygli þar vestra en hún kemur út í Bandaríkjunum í febrúar. Hefur Óskar hlotið ýmis tilboð í kjölfar myndarinnar. „Ég fæ fjölda handrita til yfirlestrar en ég gæti ekki hugsað mér að taka að mér nema kannski eitt af hverjum tíu. Þegar ég dett niður á handrit sem mér líst vel á set ég upp hugmynd að því hvernig ég sé myndina fyrir mér. Ef aðstandendum hennar líst vel á það útbý ég kynningu með nánari útlistun á minni sýn og fer yfir það á stærri fundi. Það er síðasta stigið og úr þeim hópi er einn leikstjóri valinn fyrir verkefnið," segir hann. „Ég er að reyna að vanda valið vel því næsta mynd verður auðvitað mín fyrsta mynd á ensku svo það er mikið í húfi," bætir hann við. Í augnablikinu er Óskar með þrjár myndir í vinnslu sem leikstjóri en alls óvíst er hvort og hvenær þær fari í tökur. „Ég reyni að vera með nokkra bolta á lofti í einu og sá bolti sem fyrstur fær grænt ljós verður svo tekinn fyrir, hvort sem það verður hér úti eða heima," bætir hann við og greinilegt að lífið snýst ekki bara um kokkteila og sólbaðslegu þarna í Kaliforníu.

tinnaros@frettabladid.is