Hommar, lesbíur og hinsegin jólatónleikar

„Við viljum leggja áherslu á að við séum hinsegin kór með því að gera hluti hinsegin. Til dæmis tökum við gömul lög og snúum aðeins út úr þeim, setjum hinsegin tvist á þau,“ segir Auður Emilsdóttir, ritari í stjórn Hinsegin kórsins.

Hinsegin kórinn heldur sína fyrstu jólatónleika í Iðnó þann 13. desember næstkomandi og er kórinn nú í miklum ham við undirbúning. „Okkar tónleikar eru öðruvísi en aðrir því við leggjum enga ofuráherslu á jólalög og erum ekki heldur með þessa klassísku kóratónlist. Jólalögin eru auðvitað með í dagskránni á þessum tónleikum, en við syngjum líka popptónlist og dægurlög í bland. Í raun tökum við bara tónlistina sem er í uppáhaldi hjá okkur,“ segir Auður.

Kórinn hefur verið starfræktur í eitt og hálft ár og hefur á þeim tíma komið fram við ýmis tækifæri, þar á meðal á opnunarhátíð Hinsegin daga í Háskólabíói í haust. Í kórnum eru 35 karlar og konum á öllum aldri og af öllum kynhneigðum. „Við mismunum engum sökum kynhneigðar,“ segir Auður og hlær en kórinn er hagsmunafélag í Samtökunum 78. „Við fáum að æfa í húsnæðinu hjá Samtökunum og erum með í alls konar ákvarðanatökum en erum þó ekki hluti af samtökunum,“ bætir hún við. Auður segir að auk þess að vera rosalega góður leggi kórinn sig fram við að vera skemmtilegur og öðruvísi. „Til dæmis veigrum við okkur ekki við því að hafa konur í karlaröddum og öfugt ef okkur þykir slíkt henta. Við erum galopin fyrir öllum slíkum breytingum,“ segir hún.

tinnaros@frettabladid.is