Verknám verði eflt og námstími til stúdentsprófs styttur

Starfshópur forsætisráðuneytisins um aukna samþættingu í mennta- og atvinnumálum hefur kynnt tillögur sínar. Í skýrslu hópsins kemur fram að óvenjumargir Íslendingar hafa bara lokið grunnskólaprófi.

Aukin áhersla verður lögð á verknám og tæknigreinar í íslenska skólakerfinu auk þess sem grunn- og framhaldsskólinn verður styttur ef tillögur starfshóps um samþættingu mennta- og atvinnumála ná fram að ganga. Hópurinn kynnti í gær tillögur um hvernig auka má samþættingu menntakerfisins og atvinnulífsins.

Vinna starfshópsins byggði á þingsályktunartillögu sem samþykkt var á Alþingi í júní 2011 og fjallaði um mikilvægi þess að samþætta áherslur stjórnvalda í mennta- og atvinnumálum. Var starfshópurinn skipaður í kjölfarið en í honum áttu sæti fulltrúar úr skólasamfélaginu, ráðuneytum og samtökum atvinnurekenda og launamanna.

Skúli Helgason, þingmaður Samfylkingarinnar, leiddi starf hópsins. Á kynningarfundi vegna útgáfu skýrslunnar í gær sagði hann vinnuna ekki síst hafa tekið mið af því að skömmu eftir bankahrun þegar atvinnuleysi var í sögulegu hámarki hefði borist ákall frá atvinnulífinu um að tilfinnanlegur skortur væri á starfsfólki með verk- og tæknimenntun.

Í skýrslunni kemur fram að hlutfall Íslendinga á virkum vinnualdri sem hafa ekki lokið framhaldsskólanámi er talsvert hærra en gengur og gerist í nágrannalöndum Íslands. Þá ljúka færri íslenskir nemendur framhaldsskólanámi á réttum tíma en almennt gerist í OECD-ríkjunum auk þess sem námstími á grunn- og framhaldsskólastigi er óvenjulangur hér á landi.

Starfshópurinn leggur því meðal annars áherslu á að einstaklingsmiðað nám og starfs- og verknám fái aukna áherslu í grunn- og framhaldsskólum til að tryggja að allir hafi námsmöguleika við sitt hæfi.

Þá mælir hópurinn með því að unnin verði tímasett áætlun um eflingu verk- og tæknináms á framhaldsskóla- og háskólastigi með það að markmiði að hlutfall nemenda í þess konar námi hækki úr 33% árið 2011 í 40% árið 2020.

Hópurinn telur jafnframt æskilegt að stytta námstíma í grunn- og framhaldsskóla úr fjórtán árum í þrettán og jafnvel tólf. Skúli Helgason sagði þó á fundinum í gær að stytting á námstíma væri róttæk aðgerð og krefðist því undirbúnings og samtals innan skólakerfisins. Þá benti hann á að stytting námstíma um eitt ár myndi spara á bilinu einn til tvo milljarða króna á ári sem hægt væri að nýta til að styrkja menntakerfið.

Mennta- og menningarmálaráðuneytinu verður falið að hrinda tillögum starfshópsins í framkvæmd í samráði við atvinnuvega- og nýsköpunarráðuneytið og velferðarráðuneytið.magnusl@frettabladid.is