Sakhæfur en samt of veikur fyrir fangavist á Litla-Hrauni

Maður sem veitti föður sínum alvarlega áverka sem drógu hann til dauða er nú nauðungarvistaður á öryggisdeildinni á Kleppi. Hann var metinn sakhæfur af geðlæknum fyrr á árinu og dæmdur til fjórtán ára fangelsisvistar.

Í síðasta mánuði var maðurinn nauðungarvistaður á geðdeild Landspítalans við Hringbraut. Hann var þó fljótt metinn það veikur að hann þyrfti aukna meðferð, svo hann var færður á öryggisdeildina á Kleppi.

Nauðsynlegt er að svipta hann sjálfræði, þar sem hann neitar að sækja meðferð á geðdeild. Hann verður að minnsta kosti sex mánuði inni á Kleppi.

Maðurinn, Þorvarður Davíð Ólafsson, er einn nokkurra fanga á Litla-Hrauni sem fangelsismálayfirvöld telja að þurfi sérúrræði innan kerfisins, en engin sérstök stofnun er fyrir hendi fyrir geðsjúka einstaklinga sem hafa þó verið metnir sakhæfir fyrir dómi.

Þessa fanga verður að vista í fangelsi, en réttargeðdeildin á Kleppi, sem áður var á Sogni í Ölfusi, er samkvæmt lögum einungis fyrir ósakhæfa brotamenn.

Samkvæmt reglum fangelsismálayfirvalda á að leggja fanga sem veikjast af geðsjúkdómi inn á geðdeild Landspítalans á Hringbraut. Innlögn á öryggisdeild er undantekning sem eingöngu er gripið til ef um mjög veika einstaklinga er að ræða sem neita meðferð.

Sigurður Páll Pálsson, yfirlæknir á öryggisdeildinni á Kleppi, segir afar fátítt að geðdeildir LSH taki við föngum af Litla-Hrauni, en það hafi þó gerst. „Ef einstaklingar eru metnir mjög veikir og vilja ekki nauðsynlega þjónustu, þarf að fara þessa leið,“ segir hann. „Aðalatriðið er að fangar fái sömu þjónustu og aðrir þjóðfélagsþegnar og ferlið sé eins hjá þeim og öðrum.“

Margrét Frímannsdóttir, forstöðukona Litla-Hrauns, segir að komi upp bráðaveikindi hjá föngum sem kalli á innlögn á geðdeild, sé ferlið auðveldara nú en það hafi verið hingað til.

„En við þurfum að skoða hvernig við getum bætt aðbúnaðinn og komið á sérstakri deild fyrir sakhæfa geðsjúka einstaklinga,“ segir hún. „Einnig er nauðsynlegt að skoða hvernig verði staðið að mönnun þeirrar deildar og hvort við þurfum að leggja meiri áherslu á menntun fangavarða sem annast geðsjúka fanga.“ - sv