Endaði á bráðamóttökunni

„Þetta gekk alls ekki átakalaust fyrir sig. Við tókum myndbandið upp úti á Granda við erfiðar aðstæður og kulda og svo fékk ég heiftarleg ofnæmisviðbrögð við líkamsmálningunni sem var notuð,“ segir tónlistarkonan Þórunn Antonía Magnúsdóttir sem veiktist skyndilega eftir tökur á tónlistarmyndbandi við lagið Electrify My Hearbeat.

Myndbandinu er leikstýrt af Þóru Hilmarsdóttur og fyrir tökurnar var Þórunn þakin líkamsmálningu. Daginn eftir vaknaði hún sárkvalin og var flutt á bráðamóttöku þar sem hún fékk lyf í æð.

„Ég vaknaði morguninn eftir og leit út eins og Charlize Theron í kvikmyndinni Monster og var sjö kílóum þyngri. Ég var rúmliggjandi í fjóra daga og forðaðist alla spegla á meðan. Mér leið hræðilega illa og svolítið eins og húðin væri fimm númerum of lítil. Það var erfitt að hreyfa sig og það var eins og ég væri í skrítnum, þröngum galla, og ekki á „sexý“ hátt. En þetta var þess virði því myndbandið verður algjör snilld og ég hef mikla trú á Þóru.“

Myndbandið er töluvert ólíkt því síðasta sem Þórunn Antonía sendi frá sér og lýsir hún því sem dularfullu og myrku. Hún kveðst hlakka mikið til þess að sjá myndbandið þegar það verður loks tilbúið. „Ég ímyndaði mér veru eða vélmenni sem vaknar til lífsins þegar ég samdi lagið og ég held að sú tilfinning hafi endurspeglast vel í myndbandinu.“