Úkraínustjórn sögð misnota valdastöðu

„Þegar hliðsjón er höfð af misnotkun valda og óhóflegu hlutverki peninga í þessum kosningum þá virðist sem lýðræðisferlinu hafi farið aftur í Úkraínu,“ segir Walburga Habsburg Douglas, yfirmaður eftirlitssveitar á vegum Öryggis- og samvinnustofnunar Evrópu, sem fylgdist með framkvæmd þingkosninganna í Úkraínu á sunnudag.

Viktor Janúkovitsj forseti hrósar sigri. Endanleg úrslit verða ekki tilkynnt fyrr en í dag, en þegar búið var að telja um helming atkvæða stefndi allt í að Héraðaflokkurinn, sem er flokkur forsetans, fái 240 til 260 þingsæti á 450 manna þjóðþingi landsins.

Kommúnistaflokknum, sem hefur veitt Janúkovitsj forseta stuðning, er spáð fimmtán prósentum atkvæða, en þessir tveir flokkar vilja halda góðum tengslum við Rússland.

Stjórnarandstöðuflokkarnir, sem vilja frekar tengjast Vesturlöndum en Rússlandi, ná ekki meirihluta og sitja því áfram í stjórnarandstöðu.

Flokkur Júlíu Tímósjenkó, sem nú situr í fangelsi, hafði fengið 22 prósent og flokkur boxkappans Vitali Klitsjkó var kominn með þrettán prósent.

Þá er kominn fram nýr flokkur þjóðernissinna, sem virtist ætla að fá um átta prósent atkvæða.

Í tilkynningu frá kosningaeftirliti ÖSE segir að stjórnarflokkarnir hafi staðið betur að vígi fyrir kosningarnar, bæði vegna þess að stjórnarflokkarnir hafi óspart notfært sér aðstöðu sína í ríkisfjölmiðlum og stjórnkerfinu almennt, auk þess sem fjármögnun flokksstarfs og kosningabaráttu er engan veginn nógu gegnsæ.

Þá gagnrýnir ÖSE að tveir þekktir stjórnarandstæðingar, þau Timosjenkó og Júríi Lútsjenkó, sitji í fangelsi í kjölfar réttarhalda, sem ÖSE gagnrýndi á sínum tíma. „Maður ætti ekki að þurfa að fara í fangelsisheimsókn til að heyra hljóðið í stjórnmálaleiðtogum landsins,“ segir Douglas.

ÖSE segir að fjarvera þeirra frá kosningabaráttunni hafi greinilega haft áhrif á úrslit kosninganna.

Tímósjenkó brást í gær við úrslitunum með því að hefja mótmælasvelti í fangelsinu. Hún sakar stjórnina um kosningasvindl og segir þessar kosningar hafa verið þær óheiðarlegustu í sögu landsins.