Stjörnur nota Pheed

Samskiptavefurinn Pheed hefur laðað að sér margar stjörnur aðeins einni viku eftir að hann fór í loftið. Paris Hilton, Miley Cyrus, Chris Brown og Slash eru á meðal þeirra sem nota vefinn. Þar geta meðlimir rukkað fyrir aðganginn að síðunni sinni, annað hvort með áskrift eða með því að rukka fyrir staka viðburði.

Þeir sem nota Pheed geta sett inn texta, myndir, myndbönd og tónlist inn á síðuna sína og jafnvel beinar útsendingar. „Að láta fólk borga ákveðna upphæð fyrir myndband eða lag er orðið frekar úrelt. Samskiptamiðlar í dag snúast um að selja hluta af lífi fólks,“ sagði einn af stofnendum síðunnar, O.K. Kobo, í samtali við The Telegraph.