Hvorugur vill greiða talþjálfun barna

Móðir í Hveragerði fær hvorki stuðning frá sveitarfélaginu né Sjúkratryggingum Íslands til að greiða kostnað vegna talþjálfunar dóttur sinnar.

Móðirin vill fá endurgreiddan hluta af talþjálfun sem sérfræðingur telur nauðsynlegt að dóttir hennar njóti. Eftir að hún fékk synjun frá Sjúkratryggingum leitaði hún til bæjaryfirvalda í Hveragerði enda vísuðu Sjúkratryggingar henni þangað.

Bæjarráðið segir sér ekki fært að verða við bón móðurinnar og vísar henni til baka á Sjúkratryggingar enda sé skylda þeirra að taka þátt í greiðslu vegna talþjálfunar barna og unglinga ótvíræð.

Kveðst bæjarráðið átelja Sjúkratryggingar harðlega fyrir að hafna erindi konunnar. Það sé bæði andstætt lögum og reglugerðum og í andstöðu við upplýsingar á heimasíðu Sjúkratrygginga. Þar komi fram að greiða eigi áttatíu prósent af kostnaði við nauðsynlega talþjálfun fyrstu þrjátíu skiptin fyrir börn yngri en átján ára.

Sjúkratryggingar vísa hins vegar í samning sinn við talmeinafræðinga. Bæjarráðið segir sveitarfélögin ekki aðila að þeim samningi og hann geti ekki lagt skyldu á sveitarfélög umfram það sem kveðið sé á um í lögum.

Samband íslenskra sveitarfélaga er sagt hafa unnið að lausn málsins. „Hvetur bæjarráð þá aðila sem og viðkomandi ráðuneyti til að finna ásættanlega lausn á þessu máli hið allra fyrsta því börnin líða fyrir þessa stöðu,“ segir bæjarráðið.- gar