"Þetta var alveg hræðilegt. Þegar ég kom á svæðið liggur drengurinn blóðugur á jörðinni og þeir hlupu í burtu," segir Þórarinn Engilbertsson knattspyrnuþjálfari. Hann varð vitni að fólskulegri árás fjögurra 12 til 13 ára pilta á sex ára dreng.

"Ég náði að hlaupa einn þeirra uppi og í ljós kom að þeir vildu eignast bolta sem drengurinn átti."
Þórarinn segir piltinn hafa verið lafhræddan þegar hann náði honum. Foreldrar hans hafa verið látnir vita af atvikinu, en piltarnir voru allsgáðir við verknaðinn.

Við skoðun á spítala kom í ljós að drengurinn var bæði handleggs- og kinnbeinsbrotinn. Þórarinn ræddi við foreldra hans og segist búast við að þeir ætli lengra með málið. Vitað er hver einn árásardrengjanna er og hinna er leitað.

Þórarinn var í heimsókn hjá móður sinni í Bökkunum þegar hann heyrði sáran grát berast frá fótboltavelli í grenndinni. Piltarnir fjórir höfðu þá sparkað sex ára drenginn niður. Litli drengurinn sagðist ekki hafa þekkt þá.

"Þetta var hryllingur. Ég er knattspyrnuþjálfari og vinn með börnum. Aðkoman var skelfileg og það tekur á að lenda í svona."

Ekki náðist í Ómar Smára Ármannsson, vaktstjóra lögreglunnar í umdæminu, í gær.- sv