Ballinu í London hvergi nærri lokið

Setningarathöfn Ólympíumóts fatlaðra fer fram á Ólympíuleikvanginum í London í kvöld. Um 4300 keppendur eru mættir til Englands þar sem keppt verður í tuttugu íþróttagreinum. Frjálsíþróttakappinn Helgi Sveinsson verður fánaberi Íslands og hlakkar mikið til.

„Það gerist ekki betra en að komast inn á Ólympíumótið og halda á fánanum fyrir mína þjóð. Ég trúi þessu varla enn þá," segir Helgi, sem er einn fjögurra fulltrúa Íslands á leikunum. Jón Margeir Sverrisson og Kolbrún Alda Stefánsdóttir keppa í sundi og Matthildur Ylfa Þorsteinsdóttir í frjálsum íþróttum. Hún stígur fyrst íslensku keppendanna á sviðið á föstudagsmorgun.

„Ég finn fyrir smá fiðringi í maganum. Ég held að hann eigi eftir að aukast með hverjum deginum sem líður fram að keppni," segir hin fimmtán ára Matthildur Ylfa. Jón Margeir og Kolbrún Alda keppa einnig á föstudagsmorgun í baksundi og Helgi um kvöldið í langstökki.

Fyrsta Ólympíumót fatlaðra var haldið í Róm 1960 en Íslendingar kepptu fyrst í Arnheim í Hollandi árið 1980. Sundkonan Sigurrós Karlsdóttir vann til fyrstu gullverðlauna Íslands á mótinu og Jónas Óskarsson fagnaði bronsi í lyftingum. Síðan þá hefur íslenska þjóðin getað fagnað verðlaunum á fjögurra ára fresti: 36 gull, 19 silfur og 42 brons eru uppskeran og ágætur möguleiki á því að fjölgi í verðlaunasafninu í London.

„Við höfum átt ótrúlega afreksmenn í gegnum tíðina. Það var í fyrsta skipti í Peking fyrir fjórum árum sem við fengum engin verðlaun. Ég hef fulla trú á því að einhver úr þessum hópi skili okkur verðlaunum. Við verðum að krossa fingur," segir Ólafur Magnússon, framkvæmdastjóri afrekssviðs Íþróttasambands fatlaðra.

Ólíkt Ólympíuleikunum er fjöldi keppenda á Ólympíumótunum fyrirfram ákveðinn. Að ná lágmarki er því ekki ávísun á þátttökurétt á mótinu. Því er ljóst að keppendur í London eru rjóminn af afreksfólki úr röðum fatlaðra um allan heim sem margir hverjir sitja heima með sárt ennið. Það er tilfellið á Íslandi enda fékk Ísland aðeins eitt sæti fyrir hvort kyn í frjálsum íþróttum og sundi þó fleiri hefðu náð tilskildum lágmörkum.

Reiknað er með miklu sjónarspili á setningarathöfninni á Ólympíuleikvanginum í kvöld. Í hönd fer ellefu daga veisla sem enginn íþróttaáhugamaður ætti að missa af.