Karlinn sem klifið hefur Kerlinguna

Þegar komið er í Kerlingarskarð á Snæfellsnesi blasir þar Kerling ein við á toppi Kerlingarfjalls og þó hún hafi hægt um sig hefur hún eflaust verið hin mesta ögrun fyrir hugdjarfa klifurmenn. Þó er aðeins vitað um einn sem farið hefur upp á Kerlinguna, ef svo mætti að orði komast, en það er eldhuginn Ágúst Bjartmars frá Stykkishólmi.

„Það var árið 1939 en þá vorum við skátarnir þarna í grenndinni og það þurfti náttúrulega að finna sér eitthvað að gera," segir Ágúst sem þykir ekki mikið til afreks síns koma. „Ég var með snæri og reyndi nokkrum sinnum að kasta lykkjunni yfir hausinn og svo þegar það tókst þá var ekkert annað að gera en að koma sér upp." Kerlingin er tuttugu og einn meter á hæð og þverhnípt svo það er kannski ekkert að undra þó að mönnum fallist hendur undir pilsfaldi hennar.

„Menn voru alltaf uppi í fjöllum á þessum tíma svo þetta þótti nú ekkert svakalegt," segir Ágúst hógvær.

En hann atti ekki aðeins kappi við Kerlinguna því hann er einnig fimmfaldur Íslandsmeistari í badminton.

Höfuðborgarbúum þótti það mikil hneisa þegar Hólmari kom í bæinn og vann Íslandsmeistaratitilinn árið 1958. Þá lagði hann Wagner Walbom að velli en sá danski hafði verið Jótlandsmeistari. „Menn tóku þetta óstinnt upp og það var skorað á mig að spila við hann aftur því menn voru sannfærðir um að þetta færi á annan veg ef við spiluðum aftur," segir Ágúst. „Ég sagði bara allt í lagi en þið verðið þá að koma hingað vestur og við spilum í Stykkishólmi."

Leikar þessir fóru hins vegar á versta veg á Hólminum því Walbom fékk fyrir hjartað og var hætt kominn.

„Þetta var vænn maður, hann tók öllu eins og góður íþróttamaður en það voru menn í Reykjavík sem öttu honum fram í þetta, í þá daga þótti mörgum það sárt að einhver utan af landi færi sigurför í bæinn."

Ágúst er nú áttatíu og átta ára að aldri en ennþá ólgar blóð í æðum. Hann á helminginn af Bíldey og siglir þangað reglulega á trillunni sinni.

„Ég er nú stundum skammaður fyrir að vera að fara þetta einn en þá vingsa ég bara farsímanum og svara því til að ég hringi bara ef mér þykir ástæða til," segir hann.

jse@frettabladid.is