Blindhorn og aðrar slysagildrur á stígum

Víða um höfuðborgarsvæðið má finna sameiginlega göngu- og hjólastíga, sem eru yfirleitt í mikilli notkun á sumrin. Á mörgum stöðum eru blindhorn og aðrar slysagildrur. Pjetur Sigurðsson ljósmyndari tók meðfylgjandi myndir.

Pálmi Freyr Randversson, sérfræðingur í samgöngumálum hjá Reykjavíkurborg, segist ekki fá margar tilkynningar eða ábendingar um slys á hjóla- og göngustígum. Það vanti upp á að borginni sé tilkynnt um slíkt, en mál séu tilkynnt til lögreglu ef svo ber undir og þá skoði borgin skýrslur lögreglunnar. Frekar berist ábendingar frá fólki sem búist við því að slys gætu orðið á tilteknum stöðum og þá reyni borgin að bregðast við því áður en það gerist.

Eins og sést á myndunum er gripið til ýmissa ráðstafana vegna blindhornanna, búið er að laga stígana sums staðar og á öðrum stöðum hafa verið settir upp speglar eða viðvörunarskilti.

„Svo er reynt að klippa gróður ef hann er að trufla,“ segir Pálmi Freyr. „Nú er verið að hanna nýja hjólastíga. Stígarnir sem hafa verið gerðir eru blanda af göngu- og hjólastígum og þeir eru ekki hannaðir út frá hraðanum sem hjólreiðafólk er á. Sameiginlegir stígar eru meira útivistarstígar en nú er farið að hugsa þetta meira sem samgöngur og út frá hraðanum.“ Þannig séu fleiri blindhorn í gamla stígakerfinu, en vonandi verði engin í því nýja. „Á nýju stígunum eru beygjuradíusar betur útfærðir fyrir hjól og meiri hraða.“ thorunn@frettabladid.is