Sextán fornbílar í lúxusferð um Ísland

Í júníbyrjun getur fólk átt von á því að sjá á þjóðvegum landsins 16 lúxusfornbíla á leiðinni frá Egilsstöðum til Reykjavíkur, með viðkomu á mörgum helstu ferðamannastöðum. Þarna verður á ferð hópur ferðamanna á vegum franska fornbílaklúbbsins Imperial Rallye.

„Þarna verða allt í allt um 40 manns á ferðinni,“ segir Catherine Ulrich, sem verður leiðsögumaður hópsins. Hún er landsmönnum að góðu kunn og hefur ferjað hér um margvíslega hópa síðustu 20 ár. Í vetur var hún hér á ferð í fimmtugasta sinn.

„En þetta verður nú svolítið öðruvísi, því ég er vön að vera með fólk í bílum og tala við það á leiðinni. Núna verða allir í sínum eigin bíl,“ segir Catherine, sem þó á von á því að geta frætt ferðafólkið um land og þjóð á viðkomustöðum og í matartímum.

Imperial Rallye blæs til ferða af þessu tagi á hverju ári, en í fyrra var til dæmis ekið um Portúgal og árið 2010 var ekið um Kína í fornbílum. Eðli málsins samkvæmt miða ferðir þessar að betur stæðum ferðamönnum. Catherine á þó ekki von á öðru en að vel fari um alla hér, þótt fólkið sé vant lúxus af öllu tagi.

„Þetta verður mjög skemmtilegt,“ segir hún. Bílarnir koma með Norrænu í lok maí, en fólkið með flugi til Keflavíkur annan júní. Daginn eftir fara þau svo með flugi til Egilsstaða þar sem bílaflotinn bíður þeirra. „Og þá byrjum við á því að fara til Fáskrúðsfjarðar og þar verður líka sendiherra Frakklands á Íslandi og bæjarstjórinn í Fjarðabyggð,“ segir Catherine Ulrich. Hún segir hins vegar að hópurinn fari í tveimur rútum að franska kirkjugarðinum í Fáskrúðsfirði, því þar séu ekki stæði fyrir alla fornbílana.

Hópurinn ekur síðan til suðurs, kemur við á Stöðvarfirði og gistir á Höfn í Hornafirði.

Alls verður hópurinn í viku hér á landi og heldur af landi brott mánudaginn ellefta júní. Þá verða þau líka búin að vera í tvær nætur í Reykjavík, en til stendur að halda sýningu á bílunum að kvöldi níunda júní fyrir framan Hótel Borg þar sem hópurinn gistir. „Yngsti bíllinn í hópnum er frá árinu 1975, en hinir allir eldri,“ segir Catherine.

olikr@frettabladid.is