Stórar vatnsaflsvirkjanir endurnýjanlegar?

Sameinuðu þjóðirnar hafa útnefnt 2012 ár endurnýjanlegrar orku fyrir alla. Á meðal þeirra stofnana og fyrirtækja sem vinna að útbreiðslu hennar er IRENA, en það stendur fyrir The International Renewable Energy Agency, eða Alþjóðastofnun um endurnýjanlega orku. Aðalstöðvar hennar eru í Abu Dhabi, en í Bonn er að finna Nýsköpunar- og tæknimiðstöð stofnunarinnar sem er undir stjórn Dolfs Gieden.

Alls hafa 158 lönd skuldbundið sig starfi IRENA, en aðildarþjóðirnar eru 93, þar með talið Ísland. Alls er hlutdeild endurnýjanlegra orkugjafa í heildarorkunotkun heimsins 16%, en stefnt er að því að auka hann í 30% árið 2030. Í tölunni 16% eru ekki taldar stórar vatnsaflsvirkjanir, þar sem nokkur deila er um hvort þær falli undir endurnýjanlega orkugjafa.

„Við hjá IRENA lítum á stórar vatnsaflsvirkjanir sem endurnýjanlega orkugjafa, en það gera það ekki allir. Þetta fer þó eftir því hve umfangsmikil umhverfisspjöll fylgja þeim. Séu þau of mikil teljast vatnsafslvirkjanirnar ekki endurnýjanlegur orkugjafi,“ segir Gieden.

Ljóst er að mikill vaxtarbroddur er í þessum geira og fjárfesting í honum hefur aukist frá 30 milljörðum árið 2003 í 260 milljarða árið 2011. Mismikið verkefni er fyrir höndum, en til að mynda er stefnt að því að helmingur allrar orku í Afríku komi úr endurnýjanlegum orkugjöfum árið 2030. Það er ekki í fjarlægri framtíð, heldur eftir 18 ár.