"Sælgæti“ fyrir máva stráð á velli í Kópavogi

„Munurinn liggur í því að kjötmjölið er kögglað núna en var meira duft í fyrra. Þá er þetta eins og ég sé að dreifa sælgæti á völlinn," segir Ómar Stefánsson, bæjarfulltrúi og forstöðumaður íþróttavalla í Kópavogsbæ um mávaplágu á íþróttavöllum bæjarins.

Íbúar í nágrenni íþróttavalla HK í Fossvogsdal, Kópavogsvallar Breiðabliks, Kóravallar og Versalavallar hafa kvartað undan ónæði og óþrifum af gríðarlegum mávaflokkum sem sækja í vellina. Ástæðan er kjötmjöl sem dreift var á vellina og sendir frá sér mikla lykt sem vargfuglarnir renna á. Ómar segir ekki bæta úr skák hversu hávær mávurinn sé.

„Fyrsti völlurinn slapp því þá var fuglinn ekki kominn," segir Ómar sem hefur tvær gasbyssur til umráða og fer á milli íþróttavallanna til að skjóta mávunum skelk í bringu. Þegar Fréttablaðið náði tali af honum síðdegis í gær var hann að færa gasbyssu til á Kóravelli. Þar vomuðu fuglarnir yfir en héldu sig fjarri á meðan hvellirnir ómuðu frá gasbyssunni. Ómar færði byssuna upp á þak í öryggisskyni.

„Það er svo krakkarnir geti ekki komist að henni; þetta er svo vinsælt," segir Ómar sem kveður börnin keppast við að standa sem næst gasbyssunni án þess að þurfa að halda fyrir eyrun.

Ómar segir að kjötmjöl hafi verið sett á þrjá velli í bænum í fyrra en á alla vellina að þessu sinni. Mjölið sé ekki aðeins margfalt ódýrara en tilbúinn áburður heldur líka mun betra. „Vellirnir sem fengu mjölið í fyrra líta miklu betur út en hinir vellirnir. Það er bara geggjun að kaupa tilbúinn áburð," segir hann.

Auk þess sem gasbyssunum er beitt gegn ásókn mávanna segir Ómar að unnið sé að því að fá mjölið ofan í grassvörðinn með því að slá vellina og bleyta þá hressilega. Hann vonist til að mávurinn verði á braut innan fárra daga.

„Við erum að reyna að koma honum fyrr í burt. Mitt neyðarbrauð verður að hringja í Gísla Martein og fá hann hingað með riffilinn," segir Ómar og vísar þar til umræðu sem var í Reykjavík fyrir nokkrum árum þar sem borgarfulltrúinn Gísli Marteinn Baldursson talaði fyrir því að mávum yrði kerfisbundið fækkað með skotvopnum.

gar@frettabladid.is