Listahátíð afhjúpuð

Listahátíð í Reykjavík leggur undir sig borgina frá 18. maí til 3. júní. Dagskrá hátíðarinnar var kynnt í gær.

Hrefna Haraldsdóttir, stjórnandi Listahátíðar í Reykjavík, fór yfir dagskrána á blaðamannafundi í gær. Á fimmta tug viðburða og hundruð listamanna víðs vegar að úr heiminum taka þátt í Listahátíð í Reykjavík í ár.

Dagskráin er fjölbreytt og ætti að höfða til áhugamanna um popp, klassík og heimstónlist. Bæta þurfti við aukatónleikum fyrir breska tónlistarmanninn Brian Ferry en Frakkinn Yann Tiersen er ekki síður hvalreki fyrir tónlistarunnendur. Tiersen vakti heimsathygli fyrir tónlistina í kvikmyndinni Amelie um árið en hann heldur órafmagnaða tónleika í Norðurljósum.

Rússneski píanóleikarinn Arcadi Volodos heldur tónleika í Eldborg en honum hefur verið hampað fyrir framúrskarandi túlkun og tækni. Þá stígur spænsk-afríska söngkonan Buika á svið í Eldborg á lokadegi Listahátíðar en tónlist hennar hefur meðal annars hljómað í verkum leikstjórans Pedros Almodóvar.

Íslenskir tónlistarmenn láta sitt ekki eftir liggja. Sinfóníuhljómsveit Íslands flytur sinfóníuna Rómeó og Júlíu eftir Berlioz í fyrsta sinn á íslandi ásamt einsöngvurum og þremur kórum. Anna Guðný Guðmundsdóttir og Tinna Þorsteinsdóttir flytja verk Messiaen, Visions de l‘Amen fyrir tvo flygla í fyrsta sinn á Íslandi á hádegistónleikum en ný og framsækin tónskáld verða í öndvegi í tónleikaþrennunni Flakk í Kaldalóni í Hörpu.

Dans og sviðslistListahátíð í Reykjavík er ekki bara fyrir eyru. Íslenski dansflokkurinn og GusGus leiða saman hesta sína í óhefðbundnu verki, þar sem dans, ný tónlist frá GusGus og frumsýningar stuttmynda Reynis Lyngdal og Katrínar Hall leiða gesti inn í veröld iðandi af lífi og óvæntum uppákomum.

Verkið Glymskrattinn eftir dansarana og danshöfundana Melkorku Sigríði Magnúsdóttur og Sigríði Soffíu Níelsdóttur og tónlistarmanninn Valdimar Jóhannsson verður frumsýnt í Þjóðleikhúskjallaranum. Þá verða flutt fjögur ný leikverk eftir Hrafnhildi Hagalín, Jón Atla Jónasson, Sigtrygg Magnason og Kviss Búmm Bang, sem sýnd verða á óvenjulegum stöðum víða um borgina: í fornbókaverslun, kampavínsklúbbi, heimahúsi og heilsulind.

Bræður nefnist nýtt verk úr smiðju Vesturports í samvinnu við fjögur norræn leikskáld og Pétur Gautur, verðlaunasýning Þorleifs Arnar Arnarssonar frá Luzern-leikhúsinu í Sviss, verður sýnd einu sinni á stóra sviði Þjóðleikhússins. Þar verður einnig sýnt myndbandsverk Ragnars Kjartanssonar, Bliss, sem er upptaka á samnefndum gjörningi sem hann og stór hópur tónlistarfólks flutti á Performa-hátíðinni í New York í nóvember.

Myndlist og bókmenntirYfir eitt hundrað listamenn frá Íslandi, Norðurlöndunum, Bretlandi, Frakklandi, Bandaríkjunum og víðar taka þátt í (I)ndependent People eða „Sjálfstæðu fólki“, umfangsmiklu myndlistarverkefni í samstarfi Listahátíðar, Listasafns Reykjavíkur, Listasafns Íslands, Nýlistasafnsins, Norræna hússins, Kling og Bang og Kynningarmiðstöðvar íslenskrar myndlistar. Sænski sýningarstjórinn Jonatan Habib Engqvist stýrir verkefninu. Sýningarnar hefjast allar laugardaginn 19. maí og fjöldi viðburða verður á dagskrá frá morgni til kvölds á sýningarstöðunum. Nánari upplýsingar má finna á independentpeople.is en þar munu þátttakendur verkefnisins setja inn textafærslur, ljósmyndir og fleira eftir því sem verkefninu vindur fram.

Upplestrar í heimahúsum rithöfunda eru orðnir fastur liður á Listahátíð og mælast jafnan vel fyrir. Höfundarnir sem bjóða heim í ár eru Anton Helgi Jónsson, Guðmundur Andri Thorsson, Hallgrímur Helgason, Margrét Örnólfsdóttir, Ragna Sigurðardóttir, Steinunn Sigurðardóttir og Þórarinn Leifsson. Þá verða þrír húslestrar á þýsku, sem eru nýmæli, í heimboði Einars Kárasonar, Yrsu Sigurðardóttur og Kristínar Mörju Baldursdóttur.

Hér hefur aðeins verið stiklað á stóru í dagskrá Listahátíðar. Nánari upplýsingar um dagskrá og miðaverð má finna á heimasíðu Listahátíðar, listahatid.is. Ítarlegri umfjöllun verður um staka viðburði þegar nær dregur.