Óljós ákvæði og óásættanleg

Bændasamtök Íslands leggjast alfarið gegn samþykkt frumvarps um breytingu á búvörulöggjöf og tollalögum í óbreyttri mynd. Í umsögn samtakanna um frumvarpið segir að taka verði til endurskoðunar þau ákvæði þess sem lúta að skilgreiningu á hvenær framboð búvara er ekki nægjanlegt.

Í frumvarpinu segir að framboð teljist ekki nægjanlegt sé viðkomandi vara ekki til stöðugrar dreifingar í að lágmarki 90% magni af eftirspurn. Í athugasemdum með frumvarpinu segir jafnframt að vara sé ekki í boði á innanlandsmarkaði í nægjanlegu magni sé hún eingöngu fáanleg frá einum innlendum framleiðanda. Þetta segja Bændasamtökin óásættanlegt.

Benda þau á að íslenskir bændur hafi leitast við að auka hagkvæmni framleiðslu sinnar um árabil þannig að í sumum búgreinum sé jafnvel aðeins einn framleiðandi eða einn dreifingaraðili á tilteknum vörum. Samtökin segja einnig óljóst hvað 90% af eftirspurn þýði.

Samtök verslunar og þjónustu, SVÞ, telja viðmiðin hugsanlega ígildi tæknilegra hindrana og segja þau varhugaverð.

Í umsögn SVÞ um frumvarpið segir að verði umrætt frumvarp samþykkt óbreytt liggi fyrir að viðhaldið verði flóknu tollakerfi. Til bóta yrði að taka umrætt tollakerfi til heildarendurskoðunar og í samráði við hagsmunaaðila.- ibs