Segir golfklúbba ekki skilja tækifæri í hóteli

„Ég tel að það sé ákveðinn misskilningur í gangi hjá golfklúbbunum sem eru að kæra og að með nýju hóteli fylgi verulegt tækifæri fyrir golfklúbbana sem fyrir eru á svæðinu,“ segir Hallur Magnússon, hjá félaginu Sextíu plús ehf., sem áformar að reisa hundrað herbergja hótel við fyrirhugaðan golfvöll á Minni-Borg í Grímsnesi.

Eins og fram kom í Fréttablaðinu í gær kærðu golfklúbbarnir í Kiðjabergi og Öndverðarnesi Grímsness- og Grafningshrepp til innanríkisráðuneytisins vegna ákvörðunar sveitarfélagsins um að byggja golfvöllinn á Minni-Borg. Sveitarfélagið keypti landið eftir að félag sem var að byggja völlinn fór á hausinn í miðjum klíðum.

Jafnframt hefur Grímsness- og Grafningshreppur skrifað undir viljayfirlýsingu við Sextíu plús um að félagið fái lóð undir hótel við golfvöllinn. Stefna sveitarfélagsins er síðan sögð sú að selja eða leigja völlinn sjálfan en ekkert liggur enn fyrir um þann þátt. Formaður Golfklúbbs Kiðjabergs segir ljóst að sveitarfélagið komi að rekstrinum um ókomna tíð.

Hallur segir það „stórkostlegt tækifæri“ að geta byggt áttatíu herbergja hótel við nýjan golfvöll sem uppfylli svokallaða PGA staðla. Hótelið muni einnig styðja vel við rekstur golfvallanna að Kiðjabergi og Öndverðarnesi.

„Að sjálfsögðu verður markaðssetning hótelsins meðal erlendra golfáhugamanna ekki bundin við nýja golfvöllinn, heldur áhersla lögð á svæðið sem golfparadís þar sem tækifæri er til að leika á þremur mismunandi golfvöllum í seilingarfjarlægð við hótelið,“ segir Hallur.

Að sögn Halls munu þrír golfvellir ásamt nálægðinni við náttúru- og söguperlur Suðurlands gera glæsilegt hótel að Minni-Borg að spennandi valkosti fyrir efnaða, erlenda golfáhugamenn.

„Þótt það ríki nú ákveðin tortryggni meðal golfklúbba sem fyrir eru á svæðinu þá vonumst við sem að hótelinu koma eftir góðri samvinnu um heildstæða markaðssetningu á golfparadísinni í Grímsnesi þar sem allir golfvellirnir muni njóta góðs af auk þess sem uppbyggingin mun styrkja verulega atvinnu og tekjur íbúa í sveitarfélaginu,“ segir Hallur.

Þess má geta að Hallur og fjárfestar með honum undirbúa nú einnig byggingu hótels steinsnar frá golfvellinum í Vestmannaeyjum. Þar liggur fyrir viljayfirlýsing við Vestmannaeyjabæ. „Fjárfestar og rekstraraðilar eru afar áhugasamir um þessi tvö spennandi verkefni,” segir Hallur Magnússon. gar@frettabladid.is