Samráð við íbúa um Hljómalindarreit

Íbúar, hagsmunaaðilar og Reykjavíkurborg eiga að fá að vera með í ráðum um skipulag á Hljómalindarreitnum svokallaða sem afmarkast af Laugavegi, Hverfisgötu, Klapparstíg og Smiðjustíg.

Þetta segir Hannes Frímann Sigurðsson sem stýrir verkefninu um uppbyggingu Hljómalindarreitsins.

Hannes starfar fyrir Regin, dótturfélag Landsbankans, og fer með verkefni Laugavegsreita ehf. sem eru í eigu Regins. Eignirnar á svæðinu, sem Reginn keypti af Foldum fasteignaþróunarfélagi ehf. og Festum ehf. í lok nóvember síðastliðins, falla undir eignasafn Laugavegsreita. Auk þess voru keyptar eignir á svæðinu af Landsbankanum, að sögn Hannesar.

„Okkar áform eru að skapa vettvang til samráðs og erum við að setja á laggirnar starfshóp í því skyni. Við munum reyna að finna út í samráði við íbúa, hagsmunasamtök í miðbænum og borgina, auk helstu aðila sem vilja láta eitthvað að sér kveða, hvað eigi að vera á svæðinu. Við leggjum áherslu á að ná sátt um hvað eigi að vera á reitnum,“ segir Hannes.

Hann getur þess að Laugavegsreitir ehf. hafi skuldbundið sig til þess að minnka fyrirhugað byggingamagn á reitnum.

„Tillaga arkitektur.is um skipulag á reitnum varð á sínum tíma hlutskörpust en uppi voru ólíkar hugmyndir um byggingamagn á svæðinu. Við höfum skuldbundið okkur til þess að minnka það. Við munum reyna að laga skipulagið að því sem búið er að gera en ætlum okkur að komast að því hvort vilji hafi almennt staðið til þessa,“ tekur Hannes fram.

Hugmyndir Festa ehf. voru að reisa hótel, verslunar-, veitinga- og þjónusturými á Hljómalindarreitnum.

Að sögn Hannesar kemur til greina að endurskipuleggja reitinn að hluta ef í ljós kemur að einungis verði hægt að ná sátt með því.

Vinna á hratt í málinu, að því er hann greinir frá.

„Við reynum að gera þetta fljótt og vel. Að loknu samráðsferlinu mun skipulagsferlið taka sex til tólf mánuði ef allt gengur eðlilega fyrir sig.“

ibs@frettabladid.is