Vara sterklega við asahlákunni

Sterklega er varað við vetrarumhleypingunum sem fylgja vatnsveðrinu sem nú dynur á landsmönnum. Asahlákan um helgina verður mun meiri en um síðustu helgi og hætt við eignaspjöllum og hálkuslysum.

Í tilkynningu frá tryggingafélaginu VÍS er vitnað til orða Einars Sveinbjörnssonar, veðurfræðings Veðurvaktarinnar, sem segir að vatnsveðrið verði allt annað og meira en um liðna helgi.

Við þessar aðstæður bráðnar snjór fljótt en klakinn síður, en hann er hins vegar prýðis vatnsfarvegur sem getur beint rigningar- og leysingavatni í aðrar áttir en æskilegt er með tilheyrandi skemmdarmætti, segir Einar.

Borgarstarfsmenn eru í viðbragðstöðu vegna hlýindanna. Dreifa á sandi á hálkuna í dag ef aðstæður verða eins og um síðustu helgi. „Snjóruðningstrukkarnir tíu sem eru venjulega í því verkefni að dreifa salti á stofnbrautir og helstu umferðaræðar verða sendir út til að sanda allar götur í borginni ef með þarf," segir í tilkynningu frá borginni. Þar segir einnig að margir hafi sótt sand og salt á hverfastöðvarnar til að bera á einkalóðir og innkeyrslur.

- shá, gar