Aflétta þarf óvissu verktaka

Stjórn Vaðlaheiðarganga hf. segir að unnið hafi verið að gerð ganga undir Vaðlaheiði á faglegum forsendum í fullu samráði við „þar til bæra aðila“, eins og segir í yfirlýsingu.

„Leitað hefur verið til helstu sérfræðinga landsins varðandi undirbúning og dreginn lærdómur af fyrri jarðgangaverkefnum,“ segir stjórnin. „Niðurstaða útreikninga varðandi endurgreiðslur lána er sú að verkefnið geti endurgreitt lán að fullu á grundvelli veggjalda út frá þeim forsendum sem kynntar hafa verið.“

Bornar eru saman skýrsla Pálma Kristinssonar verkfræðings og skýrsla IFS Greiningar fyrir fjármálaráðuneytið. Meginmunurinn er sagður sá að Pálmi kveðist einkum byggja á eigin reynslu ásamt upplýsingum af fundi í umhverfis- og samgöngunefnd Alþingis en IFS hafi unnið með gögn helstu sérfræðinga landsins. Fyrir liggi tilboð eða kostnaðaráætlanir fyrir alla þætti.

„Það er von félagsins að ákvörðun um framhald og undirbúning Vaðlaheiðarganga verði tekin sem fyrst til að aflétta óvissu gagnvart verktökum og öðrum sem hagsmuni hafa af framkvæmdinni. Mikilvægt er að tafir á ákvörðun skaði verkefnið ekki enn frekar,“ segja Kristín H. Sigurbjörnsdóttir formaður og meðstjórnendurnir Kristján L. Möller og Pétur Þór Jónasson í stjórn Vaðlaheiðarganga hf. - gar