Þyngja refsingar við vopnaburði

Þynging refsinga við ólöglegum vopnaburði, aukin fjárframlög til lögreglu og aukin samvinna stjórnvalda við íslensk og alþjóðleg lögregluyfirvöld eru kostir sem Ögmundur Jónasson innanríkisráðherra sér í stöðunni eftir að nýtt hættumat greiningardeildar ríkislögreglustjóra var gert opinbert. Þar er dregin upp svört mynd af glæpastarfsemi hér, þar sem um er að ræða skipulagða starfsemi bæði innlendra og erlendra glæpahópa.

Innanríkisráðherra lagði nýja hættumatið fram á fundi ríkisstjórnarinnar í gær.

„Ég vakti athygli á því að við fengum sérstaka fjárveitingu á síðasta ári til að efla forvarnir og baráttu gegn skipulagðri glæpastarfsemi. Við teljum að þeir fjármunir hafi komið að góðum notum og erum með frekari tillögur í þeim efnum til skoðunar núna,“ segir ráðherra.

„Þá er horft til breytinga á vopnalögum, eftir að í ljós kemur að aukin brögð eru að því að menn beri skotvopn. Ég mun eftir um það bil hálfan mánuð leggja frumvarp fyrir ríkisstjórnina um breytingu á umræddum lögum sem felur meðal annars í sér bann við eign og vörslu á hálfsjálfvirkum skotvopnum. Brot á slíku banni varði allt að átta ára fangelsi í stað sex eins og nú er,“ útskýrir ráðherra, sem segir vopnaburð lögreglu ekki kost að sínu skapi og hugnist lögreglu heldur ekki almennt.

Hann segir enn fremur að lögð verði áhersla á aukið samstarf við alþjóðlega löggæslu. Í næstu viku komi að frumkvæði ráðuneytisins fulltrúar frá Evrópulögreglunni til viðræðna, auk þess sem viðræður séu hafnar um að efla enn frekar samstarf innanríkisráðuneytisins og Alþingis um málefni löggæslunnar og hafi formaður allsherjarnefndar, Björgvin G. Sigurðsson, lýst vilja í þá veru.

- jss