Ekkert tilfelli af riðuveiki í fé

Ekkert nýtt tilfelli af riðuveiki greindist í sauðfé hér á landi á síðasta ári. Er það í fyrsta sinn, sem það gerist, síðan baráttan við þessa skaðræðisveiki hófst fyrir alvöru fyrir meira en 30 árum.

Árið 2010 greindist eitt tilfelli og tvö árið 2009. Þar áður greindust fimm til tíu tilfelli á ári og fyrir kom að tilfellin skiptu nokkrum tugum á ári, samkvæmt upplýsingum frá Matvælastofnun.

Riðuveiki er talin hafa borist til landsins með lifandi fé rétt fyrir aldamótin 1900. Fé sem veikist er ólæknandi og sjúkdómurinn leiðir alltaf til dauða.

Í fyrstu bar ekki mikið á tjóni af völdum veikinnar, en síðar fór hún að valda bændum miklum búsifjum. Því var tekin sú ákvörðun á áttunda áratugnum að útrýma skyldi veikinni úr landinu og allar hjarðir skornar niður þar sem veikin greindist. Í kjölfar niðurskurðar hafa farið fram umfangsmiklar sótthreinsunaraðgerðir og fjárleysi í tvö ár.

Ríkið hefur tekið mikinn þátt í kostnaði við þessar aðgerðir og viðkomandi bændum greiddar afurðatjónsbætur. Kostnaður ríkissjóðs vegna átaks gegn riðuveiki í sauðfé nam alls 667,4 milljónum króna á árunum 1998-2004.- jss