Gæsagengin mæla göturnar

Ætla má að langvarandi snjóþekja reki gæsir frá grasblettum og á flakk um götur miðborgar Reykjavíkur segir Þórólfur Jónsson, garðyrkjustjóri Reykjavíkur. Stórir gæsahópar hafa mælt göturnar í miðborginni undanfarið.

„Líklegast er að þær séu búnar að læra að þær fái mat á ákveðnum stöðum, enda verið langur kafli núna þar sem þær hafa ekki komist í grasið sem er þeirra fæða alla jafna,“ segir Þórólfur. Þá sé spurning hvort þær sæki í hlýjuna frá upphituðum gangstéttum borgarinnar.

Hann segir gæsirnar fóðraðar nokkuð víða á höfuðborgarsvæðinu.

Borgin gefi þeim í Grasagarðinum í Laugardal og í Vatnsmýrinni, en einnig séu borgararnir duglegir við að gefa öndum og gæsum brauð á tjörninni. - bj