Samstarf við Svía um iðnframleiðslu úr áli

„Það er í bígerð samstarf um þróunar- og nýsköpunarverkefni milli íslenskra hönnuða, sænskra álframleiðenda og áliðnarins hér heima,“ segir Halla Helgadóttir, framkvæmdastjóri Hönnunarmiðstöðvar Íslands.

Að verkefninu koma Hönnunarmiðstöð Íslands annars vegar og hins vegar samtök glerframleiðenda, húsgagnaframleiðenda og fyrirtækja sem framleiða vörur úr áli í Suður-Svíþjóð. Sænska sendiráðið á Íslandi átti visst frumkvæði að málinu og Samtök iðnaðarins og Samtök álframleiðenda hérlendis eiga að því aðild.

Samstarfsverkefnið var rætt á húsgagnaráðstefnunni Möbelriksdagen í Smálöndunum í Svíþjóð á miðvikudaginn. Halla Helgadóttir ítrekar hins vegar að verkefnið sé á upphafsstigi. Til dæmis sé fjármögnunin enn ekki að fullu tryggð þótt vonast sé til að sá þáttur skýrist fljótlega.

Að sögn Höllu á málið rætur í samstarfi íslenskra hönnuða og húsgagnaframleiðenda í Suður-Svíþjóð. „Hugmyndin þróaðist frá húsgögnum yfir í ál því það þótti áhugaverðara,“ útskýrir hún.

Halla minnir á að á Íslandi séu margir hönnuðir og mikil álframleiðsla en þó engin vöruframleiðsla úr áli. Í Svíþjóð séu hins vegar mörg fyrirtæki sem framleiði úr áli. Upplagt sé að leiða þessa aðila saman.

„Menn vilja rannsaka betur möguleikana á að vinna úr þeim hráefnum sem hér eru og framleiðsla úr áli er áhugaverð út frá því,“ segir Halla sem kveður tímann munu leiða í ljós hvaða hlutir gætu verið settir í framleiðslu. Það ráðist af þeirri þróun sem verði meðal hönnuðanna sem taka þátt.

„Við sjáum ekki fyrir að á stuttum tíma verðum við með úrvinnslufyrirtæki í áliðnaði hér heima en það er samt sú mynd sem við horfum til,“ svarar Halla spurð hvort stefnt sé að því að álvöruframleiðsla verði hér á landi.

Að sögn Höllu hefur verið sótt um styrk til nýsköpunarsjóðsins Nordisk Innovation Fund.

„Ef við náum öllum þráðum saman verður þetta stórt og mjög spennandi verkefni,“ segir Halla en setur þó fyrirvara við allt málið. „Það er aldrei gott að blása í lúðurinn áður en búið er að skrifað undir samningana.“

gar@frettabladid.is