Gefur vinnu og búnað í 101 milljónar framkvæmd

Oddfellowreglan hefur undirritað viljayfirlýsingu um að reglan færi Landspítalanum að gjöf framkvæmdir við líknardeildina í Kópavogi.

Eins og komið hefur fram í Fréttablaðinu á að sameina starfsemi líknardeildanna á Landakoti og í Kópavogi með fjölgun rúma í Kópavogi. Við sameininguna fækkar þó rúmum í heild.

Að því er kemur fram í frétt Oddfellowreglunnar varð líknardeildin í Kópavogi að veruleika 1. ágúst 1997 fyrir tilstilli reglunnar á 100 ára afmæli hennar. „Hún hefur síðan komið með öflugum hætti að stækkun deildarinnar, opnun dag- og göngudeildar hennar og gerð kapellunnar þar,“ segir á vefsíðu Oddfellowa.

Eins og við fyrri áfanga líknardeildarinnar mun Oddfellowreglan taka að sér að framkvæma og kosta nauðsynlegar breytingar á húsi átta, þar sem verður dag- og göngudeild, og á húsi níu þar sem verður legudeild. Þetta verður gert í samráði við starfsmenn rekstrarsviðs Landspítala sem einnig leggur til hönnun breytinganna og nauðsynlegar framkvæmdir utanhúss.

Gert er ráð fyrir að framkvæmdum við hús níu ljúki 1. apríl næstkomandi og að við hús átta verði verklok 1. október á þessu ári. Heildarkostnaðurinn er áætlaður 101 milljón króna.- gar