Réðust tvisvar inn á Dominos og hirtu tugi þúsunda

Fimm ungir karlmenn hafa verið ákærður fyrir rán á Dominos Pizza við Hjarðarhaga þann 21. febrúar síðastliðinn. Fjórir þeirra voru einnig ákærðir fyrir rán á Domnios í Spönginni þann 11. febrúar síðastliðinn.

Samkvæmt ákæru sem þingfest var í morgun fóru fjórir menn inn á veitingastað Dominos Pizza við Hjarðarhaga, með andlit sín hulin, en einn beið í bifreiðinni, skammt frá veitingastaðnum, eftir að hafa ekið meðákærðu þangað. Einn hinna ákærðu tók starfskonu Dominos og lagði enni hennar upp að vegg, annar ákærðu ýtti öðrum starfsmanni og skipaði honum að setjast í stól við hlið starfskonunnar og þriðji ákærði, sem hafði kúbein í hönd, krafðist þess að þriðji starfsmaðurinn afhenti sér peninga og tóku ákærðu 85 þúsund krónur í reiðufé sem þeir höfðu á brott með sér og skiptu á milli sín. Fimmti maðurinn ók félögum sinum á brott í bifreið og hann útvegaði lambhúshettur og kúbein sem notað var við ránið.

Í ráninu í Spönginni fóru fjórir menn að pizzastaðnum. Þrír þeirra fóru inn með hulin andlit en sá fjórði beið út í bíl skammt frá veitingastaðnum. Einn hinna ákærðu tók vaktstjórann á pizzastaðnum kverkataki, þrýsti honum upp að vegg og krafðist þess að hann upplýsti hvar peningarnir væru geymdir, sem hann gerði. Félagar hans fóru því næst inn í vaktherbergi og tóku þaðan 196 þúsund krónur í reiðufé og höfðu á brott með sér, sem ákærðu skiptu síðar á milli sín. Fjórði maðurinn ók hinum síðan á brott og útvegaði lambhúshettur sem notaðar voru við ránið.