Tvö sveitarfélög halda leikskólagjöldum óbreyttum

Einungis tvö sveitarfélög af fimmtán hafa ekki hækkað gjaldskrár á leikskólum með fæði. Þar er um að ræða Ísafjarðabæ og Seltjarnarneskaupstað. Mesta hækkunin á almennri gjaldskrá fyrir átta tíma gæslu með fæði er hjá Reykjanesbæ um 16%, Hafnarfirði um 15% og Reykjavík um 13%. Níu tíma gæsla hefur einnig hækkað töluvert eða um allt að 23%. Forgangshópar eru ekki undanþegnir gjaldskrárhækkunum sveitarfélagana, samkvæmt niðurstöðum Verðlagseftirlits ASÍ.

Um 40% verðmunur er á hæstu og lægstu gjaldskrám sveitarfélagana fyrir 8 tíma vistun með fæði. Hæsta gjaldið fyrir þessa þjónustu er 34.342 krónur hjá Ísafjarðabæ og lægst hjá Reykjavíkurborg 24.501 krónur. Mest hækkaði gjaldskráin hjá Reykjanesbæ en þar fer gjaldið úr 27.130 krónum í 31.480 krónur, sem er 16% hækkun. Hafnarfjörður hefur hækkað um 15%, úr 26.070 krónum í 30.023 krónur og Reykjavík um 13% úr 21.764 krónum í 24.501 krónur. Ísafjörður og Seltjarnarnes hafa ekki hækkað hjá sér gjaldskrána.

Frá því í ársbyrjun 2010 hafa flest sveitafélög sem skoðuð voru hækkað gjaldskrána fyrir 9 tíma vistun með fæði. 41% verðmunur er á hæsta og lægsta mánaðargjaldi. Hæsta gjaldið er á Fljótsdalshéraði en þar kostar mánuðurinn 42.296 krónur en lægsta gjaldið er í Skagafirði 30.004 krónur. Hafnarfjörður hefur hækkað gjaldskrána mest eða um 23% á milli ára.