"Hver þarf á sjálfvirkri skammbyssu að halda?"

Blátt bann við eign og vörslu á hálfsjálfvirkum skotvopnum kemur ekki til með að hafa áhrif á iðkendur skotíþrótta að mati innanríkisráðherra sem vill herða vopnalögin í landinu.

Ögmundur Jónasson, innanríkisráðherra, áætlar að leggja fyrir ríkisstjórnina frumvarp um endurskoðun á vopnalögum í ljósi þess að vopnaburður glæpamanna hefur færst í vöxt. Breytingin felur meðal annars í sér bann við eign og vörslu á ýmsum tegundum skotvopna.

„Það eru hálfsjálfvirkar byssur, við ætlum að banna hljóðdeyfa á skotvopn og við ætlum að auðvelda aukið eftirlit með íblöndunarefnum í sprengiefni og það eru ýmsar ráðstafanir af þessu tagi sem við ætlum að festa í lög, eða leggja fyrir Alþingi," segir Ögmundur.

Þó svo að hálfsjálfvirk vopn séu bönnuð hér á landi er hægt að sækja um undanþágu sem meðal annars iðkendur skotíþrótta hafa nýtt sér. Ögmundi þykir réttast að afnema þessa undanþágu.

„Hver þarf á sjálfvirkri skammbyssu að halda? Ef þú ætlar að taka þátt í íþróttinni, þá nægir þér byssa með einu skoti en þessar byssur sem um er að ræða er eitthvað sem lögreglan ein á að hafa á hendi," segir Ögmundur.