Þriðji íslenski flytjandinn á topp tíu breska listans

Of Monsters and Men náði frábærum árangri með því að ná þriðja sæti á breska listanum með sinni fyrstu plötu. Aðeins Björk og Sigur Rós höfðu áður komið plötum sínum á topp tíu þar í landi. Allir þessir flytjendur hafa einnig náð inn á topp tíu á bandaríska Billboard-listanum.

Björk var fyrsti íslenski flytjandinn sem komst á topp tíu-listann í Bretlandi árið 1993 með fyrstu plötu sinni Debut. Næstu fimm plötur hennar komust einnig á lista yfir þær tíu vinsælustu. Aðeins sú nýjasta, Biophilia, náði því ekki.

Billboard-listinn í Bandaríkjunum hefur haldið utan um plötusölu þar í landi frá árinu 1945. Þar hefur Björk einungis einu sinni komist á topp tíu, eða með Volta.

Sigur Rós hefur tvisvar komist á lista yfir tíu vinsælustu plötur Bretlands. Besti árangur hennar er 5. sæti en sveitin náði því áttunda með Valtara sem kom út fyrr á þessu ári. Í Bandaríkjunum náði Sigur Rós 7. sæti með sömu plötu og er hún sú eina frá sveitinni sem hefur komist þar inn á topp tíu.

Of Monsters and Men hefur fetað í fótspor Bjarkar og Sigur Rósar með frumburði sínum My Head is an Animal. Þriðja sætið í Bretlandi jafnar met Bjarkar hvað varðar fyrstu plötu. Sjötta sætið á Billboard-listanum er aftur á móti besti árangur sem íslenskur flytjandi hefur náð á þessum sögufræga lista.

Aðrir sem hafa verið nálægt því að komast á topp-tíu í Bretlandi eða í Bandaríkjunum eru Jónsi úr Sigur Rós með sólóplötu sína Go, sem náði 20. sæti í Bretlandi og því 23. í Bandaríkjunum, og Sykurmolarnir með Björk í fararbroddi, sem náðu öllum þremur plötum sínum í 14., 15. og 16. sæti í Bretlandi frá 1988 til 1992.

freyr@frettabladid.is