Leikvélin: Tengdó mikilvægasta sýning ársins

Menningarvefurinn Reykvélin tilkynnti í dag hvaða leiksýning hlyti Leikvélina 2012 í ár. vefurinn, sem samanstendur meðal annars af fagfólki í leikhúsiðnaðinum á Íslandi, tilnefndi sjö leiksýningar en hlutskörpust varð sýningin Tengdó sem leikhópurinn CommonNonsense setti upp í Borgarleikhúsinu.

Það er Jón Páll Eyjólfsson sem leikstýrði sýningunni og þau Valur Freyr Einarsson og Kristín Þóra Haraldsdóttir fara með aðalhlutverkin.

Í öðru sæti varð sýning leikhópsins Sextán elskendur sem settu upp verkið Sýning ársins síðasta vetur, og hlaut töluverða fjölmiðlaumfjöllun, þá helst vegna þess að sýningin byggði á niðurstöðum skoðanakönnunar félagsvísindadeildar Háskóla Íslands um viðhorf Íslendinga til leikhúss.

Það var svo leikritið Beðið eftir Godot í uppsetningu Kvenfélagsins Garps sem lenti í þriðja sætinu. Það leikrit var einnig sýnt í Borgarleikhúsinu.

Gríman verður veitt við hátíðlega athöfn annað kvöld en það er stórsýningin Vesalingarnir sem fengu flestar tilnefningar til Grímunnar í ár. Sérstakur þáttur verður sýndur um hátíðina á föstudaginn á Stöð 2.

Leikvél Reykvélarinnar er tilkynnt nú í fyrsta skiptið en vefurinn hefur verið starfræktur í vetur. Í dómnefndinni sátu meðal annars María Kristjánsdóttir og Símon Birgisson leikhúsgagnrýnendur og rithöfundurinn Hlín Agnarsdóttir.

Hægt er að fræðast nánar um verðlaunin hér.