Óvíst að Aserum sé greiði gerður ef Íslendingar sitja heima

Það hefur engin ákvörðun verið tekin um það að hætta við þátttöku í Eurovision í Aserbaijan, segir Páll Magnússon útvarpsstjóri. Nafni hans, Páll Óskar Hjálmtýsson, hefur sagt opinberlega að hann vilji að Ísland taki ekki þátt í keppninni vegna mannréttindabrota í landinu. Nýjasta dæmi um þau er að íbúar í Bakú, höfuðborg landsins, hafa verið reknir af heimilum sínum og þau jöfnuð við jörðu. Þetta er gert til þess að hægt sé að byggja tónleikahöll fyrir keppnina.

Páll Magnússon segir að sjónarmið nafna hans séu góð og gild. „Það eru á þessu máli tvær hliðar. Það er hægt að halda því fram að við ættum að mótmæla með því að fara hvergi, en það er líka hægt að leiða nokkur rök að því að við værum ekki að gera fórnarlömbunum neinn greiða með því," segir Páll. Máli sínu til stuðnings segir Páll Magnússon að harðstjórnaraðgerðir af þessu tagi tíðkist á hverjum degi í Aserbaijan. Eina ástæðan fyrir því að þau séu núna komin í heimsfréttir sé sú að þetta hafi verið í tengslum við Eurovision. „Og þá er með góðum rökum hægt að segja að einmitt það að Eurovison sé haldin þarna þá hafi hún vakið athygli á illvirkjum ríkisstjórnar sem annars hefðu ekki komist í hámæli. Annars hefðu þau getað í sínum venjulega friði verið að kúga sína þegna," segir Páll.

Páll segir að engin ákvörðun um málið hafi verið tekin. Það liggi svo sem ekki á því. „Enda er keppnin ekki alveg að bresta á," segir Páll. „Núna í lok mánaðarins er fundur útvarpsstjóra Norðurlandanna og ég reikna með að þetta mál muni bera þar á góma þó það sé ekki formlega á dagskrá," segir Páll og bætir því við að hugsanlega muni Norðurlöndin taka sameiginlega afstöðu í þessu máli.

En hvað sem þáttöku Íslands í Eurovision líður er ljóst að Söngvakeppni Sjónvarpsins mun hafa sinn gang. Lokakvöldið fer fram næsta laugardagskvöld. Páll segir að Söngvakeppni Sjónvarpsins og Eurovision séu óskyld mál jafnvel þótt sá háttur hafi jafnan verið hafður á að sá sem vinni keppnin hér heima sé jafnan sendur til þátttöku úti.