Gera ráðstafanir vegna díoxíns

Sorpsamlag Þingeyinga hefur gripið til ráðstafana eftir að magn díoxíns og köfnunarefnisoxíðs reyndist yfir viðmiðunarmörkum þegar útblástur frá stöðinni var mældur í september 2011, en niðurstöður mælinganna bárust 5. janúar síðastliðinn.

Ástæða þess að efnin mældust yfir mörkum er talin vera sú að hærra hlutfall lífræns úrgangs í sorpinu í sláturtíðinni í haust og breytt eldsneytisnotkun hafi tímabundið aukið hlutfall efnanna í útblæstri Sorpsamlagsins.

Daginn sem mælingin var gerð var hlutfall sláturúrgangs um 30% sorpsins, en þá stóð sláturtíð sem hæst. Að auki má reikna með að hlutfall lífræns úrgangs í almennu sorpi hafi verið um 25%. Þetta háa hlutfall lífræns úrgangs er talið hafa aukið tímabundið díoxin í útblæstrinum. Stjórnendur samlagsins munu nú endurskoða móttöku sína á sláturúrgangi og flokkun á lífrænum úrgangi frá almenningi.

Til þess að draga úr rekstrarkostnaði var ákveðið sumarið 2011 að blanda dísilolíu, sem notuð er í brennara, með flotaolíu. Talið er að flotaolían hafi aukið köfnunarefnisoxíð í útblæstrinum og hefur notkun hennar nú verið hætt.- shá