Búist við mun meiri leysingum en síðast

Einar Sveinbjörnsson veðurfræðingur segir að vatnsveðrið sem búist er við að hefjist á höfuðborgarsvæðinu í kvöld og næstu daga verði mun meira en um síðastliðna helgi, sem mörgum þótti nú nóg um. Í tilkynningu frá tryggingafélaginu VÍS er haft eftir Einari og úrkoman gæti fram á laugardag numið 30 til 40 millimetrum og jafnvel meiru í efri byggðum.

Mest verður úrkoman að sögn Einars á vestan- og sunnanverðu landinu og hitinn allt að 7°C. Einar segir að mesta úrkoman verði í nótt og aftur snemma á laugardagsmorgun. Við það bætist að nýi snjórinn, sem ætla má að sé um 7-10 cm þykkur, bráðni fljótt við þessar aðstæður. Klakinn haldi betur, en hann sé hins vegar prýðis vatnsfarvegur sem geti beint rigningar- og leysingavatni í aðrar áttir en æskilegt sé með tilheyrandi skemmdarmætti.

Í tilkynningu VÍS segir að um liðna helgi hafi borist 130 símtöl í neyðarnúmer VÍS eða fimmfalt fleiri en alla jafnan um helgar. „Þriðjungur þeirra sem hringdi vegna vatns átti við leka að stríða frá þaki eða svölum. Það eru ekki bótaskyld tjón og geta reynst viðkomandi dýr. Til að fyrirbyggja þau eftir föngum þarf að moka af svölum, berja klaka úr þakrennum og hreinsa þök eftir megni svo fremri sem það er hægt án þess að setja sig í hættu."

„Kostnaður við viðgerðir getur hlaupið á hundruðum þúsunda og forvarnirnar eru því fljótar að skila sér í heimilisbókhaldinu. Þá er nauðsynlegt að hreinsa vel frá niðurföllum og bræða klaka ofan af þeim og úr, áður en vatnsveðrið byrjar þar sem mun erfiðara er að standa í slíku þegar allt er komið á flot."