Segir tillöguna um að draga ákæru til baka Alþingi til minnkunar

Hreyfingin segir tillögu til þingsályktunar um afturköllun ákæru á hendur Geir H. Haarde, fyrrverandi forsætisráðherra, Alþingi til minnkunar.

Í yfirlýsingu frá Hreyfingunni segir að sú ákvörðun forseta Alþingis, að taka tillöguna á dagskrá, og grípa þar með inn í dómsmál, sé í hrópandi ósamræmi við fyrri afstöðu forseta í sambærilegu máli; máli níumenninganna svokölluðu, sem ákærðir voru fyrir árás á Alþingi.

„Að taka tillögu sem þessa á dagskrá er að okkar mati bæði Alþingi sem og forseta þingsins til minnkunnar," segir svo orðrétt. Þá gagnrýnir Hreyfingin að tillagan skuli vera tekin fyrir á þriggja ára afmæli búsáhaldabyltingarinnar, sem er á morgun.

Hér fyrir neðan má lesa tilkynninguna í heild sinni:

Formaður Sjálfstæðisflokksins, hefur lagt fram tillögu til þingsályktunar um afturköllun ákæru á hendur Geir H. Haarde, fyrrverandi forsætisráðherra. Tillagan er á dagskrá Alþingis á morgun, föstudaginn 20. janúar 2012, á þriggja ára afmæli búsáhaldabyltingarinnar.

Sú ákvörðun forseta Alþingis að taka tillöguna á dagskrá, og grípa þar með inn í dómsmál, er í hrópandi ósamræmi við fyrri afstöðu forseta í sambærilegu máli; máli níumenninganna svokölluðu, sem ákærðir voru fyrir árás á Alþingi, máli valdsins gegn skrílnum. Að taka tillögu sem þessa á dagskrá er að okkar mati bæði Alþingi sem og forseta þingsins til minnkunnar. Í ljósi þess vantrausts sem ríkir í garð þingsins töldu sjálfsagt margir að botninum væri náð. Því miður hefur forseta þingsins nú tekist að setja Alþingi enn neðar með þessari þjónkun við þá pólitísku yfirstéttar sem hún tilheyrir.

Æðstu embættum samfélagsins fylgja ábyrgð og skyldur. Því hlýtur að vera eðlileg krafa að þeir sem embættunum gegna axli ábyrgð á störfum sínum. Í því sambandi er mikilvægt að hafa í huga að málið gegn fyrrverandi forsætisráðherra byggist á lögum um ráðherraábyrgð.

Birgitta Jónsdóttir,

Margrét Tryggvadóttir,

Þór Saari