Aldrei sést fleiri hafernir á svæðinu en í ár

Árleg talning vetrarfugla, sem er nýlokið, sýnir mikið og fjölskrúðugt fuglalíf á norðanverðu Snæfellsnesi. Á talningasvæðunum nú voru 29 þúsund fuglar af 39 tegundum.

Fuglalífið er óvenju blómlegt vegna mikillar síldargengdar í Breiðafirði, og á það við fjórða veturinn í röð. Nú sáust enn fleiri fuglar en áður, að því er kemur fram á vef Náttúrustofu Vesturlands.

Á meðal þess sem mesta athygli vekur er gríðarlegur fjöldi máfa, súlna og annarra fiskæta. Algengustu tegundirnar voru svartbakur, æðarfugl og hvítmáfur en máfar, æður, súla og fýll voru samtals ríflega 80% af heildarfjölda. Samtals sáust 16 hafernir, fleiri en nokkru sinni fyrr.

Náttúrufræðistofnun tekur við niðurstöðum talninganna og er búist við að talið hafi verið á nærri 180 svæðum á Íslandi í ár.

Árlegar vetrarfuglatalningar hófust á Íslandi um jólaleytið 1952 að bandarískri fyrirmynd. Á síðustu árum hafa hátt á annað hundrað manns tekið þátt. Talningar fóru lengst af fram um jólin og af þeim sökum hafa talningar þessar oft verið nefndar jólatalningar.

Markmiðið er að safna upplýsingum um fjölda og dreifingu fugla að vetrarlagi. Talningar eru staðlaðar og geta því nýst til vöktunar einstakra stofna. - shá