Neita samráði um úttektargjald

Viðskiptabankarnir þrír eru byrjaðir að taka sérstakt gjald fyrir úttektir úr hraðbönkum af öðrum en eigin viðskiptavinum. Þeir neita því allir að hafa haft samráð um þessa gjaldtöku.

Það er af sem áður var þegar hægt var að fara í hvaða hraðbanka sem er og taka út pening, án þess að greiða fyrir það aukagjald.

Íslandsbanki tekur lægsta gjaldið, 95 krónur. Þá kemur Arionbanki með 110 krónur. Hæsta gjaldið er síðan hjá Landsbankanum, 150 krónur.

Fréttastofa hafði samband við þessa þrjá banka í dag og fengust þau svör að gjaldið væri tekið upp til að mæta kostnaði við rekstur bankanna, og að samskonar gjald sé við lýði víða um heim.

Ítrekað skal að það kostar ekkert fyrir viðskiptaavini að nota hraðbanka eigin viðskiptabanka.

Við fórum á stúfana í dag og byrjuðum í höfuðstöðvum Arionbanka í Borgartúni, með debetkort frá Íslandsbanka. Þegar útttekt hafði verið samþykkt birtist þessi tilkynning að 110 króna gjald yrði tekið, og viðskiptavini gefinn kostur á að halda áfram, eða hætta við.

Næsti viðkomustaður var Íslandsbanki við Lækjargötu, með debetkort frá Landsbankanum. Engin tilkynning kom um að gjaldfært yrði fyrir úttekt og fengust þær skýringar að enn væri verið að innleiða kerfið og uppfæra hugbúnað í hraðbönkunum. Ef engin tilkynning kemur, er ekki tekið gjald.

Það var sama sagan í Landsbankanum á Laugavegi. Engin tilkynning, ekkert gjald. Gert er ráð fyrir að uppfærsla hraðbankanna ljúki á næstu vikum.

Athygli vekur að innleiðing kerfisins stendur yfir hjá öllum bönkunum á sama tíma. Spurðir hvort þarna hafi verið um samráð bankanna að ræða fékkst einfalt svar: Nei.