Bankarnir byrji samt að endurreikna lánin

Bankarnir ættu strax að byrja að endurreikna öll þau lán þar sem fullnaðarkvittanir liggja fyrir og ljóst er að fólk og fyrirtæki hafa staðið í skilum með lán sín. Þetta segir Ásta Sigrún Helgadóttir, umboðsmaður skuldara. Hæstiréttur dæmdi í gær að óheimilt væri að reikna vexti afturvirkt af ólöglegum gengislánum, ef fullnaðarkvittanir liggja fyrir. Talið er að dómurinn feli í sér mikilvæg skilaboð um það hvernig bankarnir eigi að haga endurútreikningi slíkra lána.

Efnahags- og viðskiptanefnd Alþingis kom saman eftir hádegi í dag til að ræða niðurstöður dómsins. Á fundinn mættu meðal annars fulltrúar bankanna, fulltrúar Hagsmunasamtaka heimilanna, auk Ástu Sigrúnar og fleiri. „Mér fannst þessi fundur mjög góður og málefnalegur og ég finn að það eru allir sem vilja gera allt sem hægt er til að flýta þessu," segir Ásta Sigrún.

Hún segir að bankarnir eigi að hefja endurútreikning lána strax í þeim tilfellum þar sem það liggur ljóst fyrir að fólk hafi staði skil á greiðslunum. „Nú erum við komin algjörlega með þetta og ég sé þvi ekkert til fyrirstöðu að byrja á því," segir hún. Hún bendir þó á að staðan sé öllu flóknari í mörgum öðrum tilfellum eins og í tilvikum þar sem fólk hafi fengið greiðsluaðlögun og annað slíkt. Þau mál þurfi að skoða nánar.

Ásta Sigrún hefur sagt að of seint gangi að fá skorið úr réttarágreiningi varðandi málin. Samkomulag tókst fyrr á árinu um að höfðuð yrðu ellefu prófmál til þess að fá skorið úr helsta ágreiningi. Einungis er búið að þingfesta tvö þeirra fyrir héraðsdómi. Það beri þó að hafa það í huga að um sé að ræða flókin mál. „Þetta eru auðvitað flókin mál í eðli sínu og þessi endurútreikningur líka. Og það er líka hluti af ástæðunni fyrir því að þetta hefur tekið svona langan tíma," segir Ásta.