Hörkudugleg í háskólanámi samhliða rekstri

María Builien Jónsdóttir, 23 ára, nemi í líffræði við Háskóla Íslands situr ekki auðum höndum því samhliða náminu rekur hún ICE import ehf. Lífið fékk að skyggnast inn í einn ósköp venjulegan dag hjá Maríu.



07.00 Vakna og fæ mér granóla í morgunmat.

08.00 Sæki litla bróður minn og við keyrum samferða niður í Háskóla Íslands þar sem ég er í fullu námi í líffræðinni. Þar legg ég áherslu á allt sem tengist manninum og erfðafræði hans.

11.30 Fæ mér góðan hádegismat, oft afgang frá kvöldinu áður eða góða súpu, og drekk síðan einn Aloe Vera King yfir daginn.

12.00 Mæti í verklega tíma eða þá ég fer beint upp á bókasafnið í Öskju og læri og vinn í fyrirtækinu mínu, ICE import í gegnum síma og tölvu, en fyrir ári síðan stofnaði ég heildsölufyrirtæki sem flytur inn alveg náttúrulega drykki eins og Aloe Vera King/Queen frá OKF í Kóreu og er ég núna að bæta tedrykkjum við línuna.

18.00 Ef tími gefst til reyni ég að mæta á æfingu en fer annars heim og sinni hundunum mínum tveimur. Ég á bæði Pug og Doberman sem þurfa mikla athygli. Ég heyri síðan alltaf aðeins í mömmu eða pabba.

19.00 Létt húsverk og geri kvöldmat fyrir mig og kærastann en yfirleitt er það soðin ýsa eða bakaður lax sem verður fyrir valinu – um þrisvar til fjórum sinnum í viku.

20.00 Held áfram að læra og vinn í bókhaldi fyrirtækisins, útbý reikninga og geri áætlanir og ræði við starfsmann um það sem var gert yfir daginn.

00.00 Sofna vel þreytt eftir daginn.

Lífið - lesa blaðið í heild sinni.