Sjá gjaldtöku ekki sem lausn

„Þetta er ekki lausn á málinu og við höfum ekki hugsað út í þetta á þennan hátt," segir Gunnar Stefánsson, sviðsstjóri björgunar- og slysavarnarsviðs hjá Slysavarnarfélaginu Landsbjörg, um hugmyndir Ólínu Þorvarðardóttur vegna tryggingamála í tengslum við bíla sem sitja fastir í snjósköflum og ófæru.

Fréttablaðið greinir frá því í dag að björgunarsveitir beri ábyrgð á skemmdum sem verða við þessar aðstæður. Sveitirnar þurfi að borga á annað hundrað þúsund krónur fyrir hvern bíl sem skemmist, ákveði eigandi bílsins að sækja rétt sinn til tryggingarfélagsins. Ólína Þorvarðardóttir, björgunarsveitamaður og alþingismaður, sagði í samtali við Vísi í dag að það væri ekki óeðlilegt að sá sem dregur annan bíl og er við stjórnina beri ábyrgð á því sem gerist. Aftur á móti þurfi Slysavarnafélagið Landsbjörg að fara að íhuga hvort skynsamlegt yrði að taka gjald fyrir þjónustu sem veitt er þegar bílar eru dregnir út úr snjósköflum og ófærum.

Gunnar segir að Slysavarnarfélaginu Landsbjörg lítist ekkert á þetta og mesti viljinn standi bara til þess að vinna þessi mál í samstarfi við bílaeigendur og tryggingafélögin að finna lausn á þessu í sátt. Í Fréttablaðinu í dag er jafnframt bent á að Landsbjörg hafi ítrekað óskað eftir því við stjórnvöld og þingmenn að björgunarsveitirnar fái undanþágu í lögum svo tjón sem hér um ræðir falli ekki á sveitirnar ef þær eru við björgunarstörf. Slíkar hugmyndir munu þó ekki hafa náð inn í þingnefndir, hvað þá lengra.