Lýtalæknirinn mögulega skaðabótaskyldur

Ábyrgð lýtalæknisins er mun meiri þar sem hann flutti púðana inn sjálfur, að mati talsmanns neytenda. Hann telur að konur sem fengu grædda í sig PIP púða hér á landi geti átt rétt á skaðabótum.

Þrjátíu íslenskar konur með gallaða sílikonpúða frá franska framleiðandanum PIP hafa fengið lögfræðing til að undirbúa málsókn á hendur lýtalækni sínum, Jens Kjartanssyni. Konurnar krefjast þess að fá púðana fjarlægða sér að kostnaðarlausu.

Læknirinn gerði ekki aðeins aðgerðir á konunum heldur flutti púðana líka inn. Gísli Tryggvason, talsmaður neytenda, segir það auka á ábyrgð hans. Um tvenns konar ábyrgð gagnvart konunum sé að ræða, annars vega sérfræðingaábyrgð og hins vegar hlutlæga ábyrgð.

„Hún er aðeins háð því að vara teljist hafa verið gölluð. Til dæmis ekki eins örugg eins og vænta mátti, sem ég tel nú líklegt að eigi við í þessu tilviki. Hún hvílir á framleiðendum, innflytjendum og dreifingaraðilum vörum," segir Gísli.

Þær konur sem hafi orðið fyrir fjárhagslegu eða tilfinninglegu tjóni geti því átt rétt á skaðabótum.

„Síðan þarf að sýna fram á orsakatengsl og tjón. Tjónið er væntanlega margþætt, það er annars vegar fjárhagslegt tjón vegna vinnutaps og kostnaðar við aðgerð ef að hið opinbera dekkar það ekki. Síðan er það hugsanlega miskatjón," segir Gísli.

Jens segir það sjálfur í höndum lögfræðinga að meta ábyrgð sína.

Guðbjartur Hannesson velferðaráðherra sagði í fréttum okkar í gær að til greina komi að ríkið tryggi lækniskoðun allra þeirra kvenna sem eru með sílikonpúða frá PIP og aðgerðir fyrir þær sem þurfa að láta fjarlægja púða sem leka. Ljóst er að kostnaður af slíku er nokkur. Guðbjartur segir verið að fara yfir það hvort að umræddur læknir verði látinn taka þátt í kostnaði.

„Það er alveg ljóst að það eru ótrúlega margar spurningar sem hafa vaknað í kringum þetta mál. Þetta er unnið meira og minna á einkastofu. Þarna er sami innflytjandi og söluaðili á hlutunum sem notaðir eru og gerir aðgerðirnar. Það eru mjög mörg álitamál," segir Guðbjartur.