Ónýtu sílíkonpúðarnir mesta áfall ferilsins

Lýtalæknirinn, sem flutti inn PIP sílikon púðana hingað til lands, segir málið mesta áfall sem hann hafi lent í á ævinni fyrir utan veikindi konu sinnar. Hvarflað hafi að honum að hætta störfum.

Um fjögur hundruð íslenskar konur eru með sílikonpúða frá franska framleiðandanum PIP. Jens Kjartansson, lýtalæknir, framkvæmdi aðgerðir á nær öllum þessum fjögur hundruð konunum á árunum 2000 til 2010 á skurðstofu í Domus medica. Hann flutti einnig sjálfur sílikonpúðana inn til landsins og í örfáum tilvikum lánaði hann PIP sílikonpúða til félaga sinna á skurðstofunni.

Jens baðst undan sjónvarpsviðtali þegar eftir því var leitað en féllst á að veita fréttastofu símaviðtal. Jens er yfirlæknir lýtalækninga á Landspítalanum og segir hann óvíst hvaða áhrif málið hafi á starf sitt á spítalanum.

„Þetta er náttúrulega mesta áfall sem ég hef lent í á ævinni fyrir utan veikindi konunnar minnar. Þetta hefur bara áhrif á mig sem persónu og ég náttúrulega verð bara að reyna að vinna úr því. Maður verður að reyna að taka á því sem rekur á manns eign fjörur. Auðvitað er ég ótrúlega leiður yfir þessu og finnst þetta ömurlegt í alla staði en hvort að ég hætti að vinna sem læknir eða hvað ég geri í framhaldi er ennþá bara opið," segir Jens Kjartansson, lýtalæknir.

Hann segir málið hafa skaðað sinn feril og hefur hann velt fyrir sér að hætta að starfa sem lýtalæknir.

„Það hefur hvarlað að mér já að hætta bara þessu en ég er nú ekki viss um að ég geri það samt. Vegna þess að ég get ekki sagt það að ég upplifi það þannig að þetta sé mér að kenna. Mér finnst ég vera meira fórnarlamb aðstæðna eins og þetta mál hefur allt komið upp," segir Jens.