Rústaði húsi á Álftanesi - í 18 mánaða fangelsi

Björn Bragi Mikkaelsson hefur verið dæmdur í átján mánaða fangelsi fyrir að hafa lagt hús sitt á Álftanesi í rúst, fyrir að hafa ekki staðið skil á skattgreiðslum, fyrir fjársvik og brot gegn bókhaldslögum í rekstri fyrirtækisins Sun House. Auk fangelsisdómsins er Björn Bragi dæmdur til að greiða um átján milljónir króna vegna fjár sem hann hafði svikið út.

Björn Bragi vakti töluverða athygli þegar hann lagði húsið sitt í rúst fyrir framan sjónvarpsmyndavélar á þjóðhátíðardaginn 17. júní 2009. Hann sagðist í samtali við fréttastofu á þeim tíma ekki hafa neinu að tapa. Hann sagðist hafa misst húsið á uppboði skömmu eftir bankahrunið. Lánin sem voru á húsinu hafi verið í erlendri mynt og hann ekki séð sér fært að halda því. Hann hafi reynt að semja við bankann en ekkert verið hlustað á hann.

Dómurinn var kveðinn upp í Héraðsdómi Reykjaness.