Umræða um áhrif krabbameins á kynlíf getur bjargað mannslífum

Opinská umræða um áhrif krabbameins á kynlíf getur átt þátt í að bjarga mannslífum, segir karlmaður sem sjálfur missti alla löngun og kyngetu eftir að hann greindist með sjúkdóminn þrítugur að aldri.

Steinar Aðalbjörnsson gekkst undir skurðaðgerð fyrir tólf árum þar sem annað eistað var fjarlægt vegna krabbameins. Hann komst fljótlega til heilsu og þurfti hvorki að ganga í gegnum geisla né lyfjameðferð, en að einhverju tíma liðnum fór hann að finna fyrir skringilegum einkennum.

„Ég kem fáu í verk og það sem kannski hefur hve mest neikvæð áhrif á mig, var getan til þess að stunda kynlíf og áhuginn til að stunda kynlíf," segir Steinar.

Hann segir, án þess að gera lítið úr sjúkdómnum, að erfiðleikarnir í raun byrjað þegar einkennin gerðu vart við sig.

„Maður fór að finna alls konar ástæður til þess að fara ekki að sofa þegar kærastan fór að sofa. Og svo var það líka orðið þannig að maður fór bara að hugsa, hvernig kemst maður út úr þessu, hvernig getur maður hætt með henni til þess að þurfa ekki að glíma við þetta. Þetta var orðið svo þungt á manni."

Steinar prófaði meðal annars stinningarlyf án þess að vera kunnugt um rót vandans, sem var minni framleiðsla testesteróns. Nú fær hann hormónasprautur á sjö vikna fresti og meðferðin skilar tilsettum árangri.

„Þremur eða fjórum vikum eftir sprautuna þá er ég orðinn virkilega góður, virkilega sáttur við sjálfan mig og haga mér í raun og veru eins og ég á að gera, og eins og flest fólk myndi gera."

Steinar verður gestafyrirlesari ásamt sérfræðingum og öðrum sem gengið hafa í gegnum svipaða reynslu á ráðstefnunni Kynlíf og krabbamein sem krabbameinsfélagsins stendur fyrir á fimmtudaginn klukkan hálf fimm. Talið er að 50-70% krabbameinssjúklinga glími við einhvers konar kynlífsvandamál sem rekja má til sjúkdómsins eða meðferðar og því snertir þetta væntanlega marga Íslendinga. Steinar telur að opinská umræða um áhrif krabbameins geti hjálpað mörgum.

„Þetta er stundum bara spurning um líf og dauða. Ef karlmenn standa sig ekki í bólinu þá er þessi pressa sem við oft á tíðum setjum sjálfir á okkur, að við séum ómögulegir. Menn eiga þá til að koma sér út úr hjónaböndum af því að þeir eru bara ekki að standa sig og það kannski tekur við þunglyndi og það eru þess dæmi á meðal karlmanna um allan heim að menn taki líf sitt þegar þeir eru hreinlega bara komnir svo langt niður vegna þess að þeir geta ekki sinnt þessari skyldu sinni, að standa sig í svefnherberginu."

Hér má finna nánari upplýsngar um ráðstefnu Krabbameinsfélagsins.