Sumargötur í Reykjavík frá 17. júní

Frá og með þjóðhátíðardeginum 17. júní taka gildi sumarlokanir á Laugavegi neðan Vatnsstígs og á Skólavörðustíg neðan Bergstaðastrætis.

Í tilkynningu frá Reykjavíkurborg segir að þessar götur verði lokaðar fyrir bílaumferð fram yfir Menningarnótt 20. ágúst. Öll þjónusta við rekstraraðila fer fram um þvergötur fram til klukkan 11:00 alla virka daga.

„Í skoðanakönnun sem gerð var meðal borgarbúa kom í ljós að þorri þeirra sem tóku afstöðu, eða 75%, var fylgjandi því að Laugavegur væri göngugata yfir hásumarið. Í fyrrasumar stóð Hitt húsið og starfshópar sem styrktir voru af borginni fyrir ýmsum skemmtilegum uppákomum í miðborginni, m.a. götuleikhúsum og innsetningum á þessum sumargötum."

Þá segir ennfremur að reynslan hafi leitt í ljós að göngugötur í miðborginni auðgi mannlífið og bæta aðgengi gangandi og hjólandi fólks að verslun og þjónustu. „Í sumar er gert ráð fyrir mikilli aukningu ferðamanna og eiga flestir þeirra erindi í miðborg Reykjavíkur. Sumargötur er sameiginlegt verkefni borgaryfirvalda og rekstraraðila til að taka sem best á móti gestum í miðborginni."