Konunni enn haldið sofandi

Konu sem stökk út úr brennandi húsi er enn haldið sofandi á gjörgæsludeild Landspítalans. Líðan hennar er óbreytt og vakthafandi læknir getur ekki gefið frekari upplýsingar um batahorfur.

Konan kastaði sér út um glugga á logandi húsi í Borgarnesi í fyrrinótt. Fallið var 6 til 8 metrar og steinsteypt gangstétt fyrir neðan.

Þyrla kom konunni á Landspítalann og þar liggur hún nú undir umsjá lækna.

Lögreglan rannsakar nú eldsupptökin. Tæknimenn frá lögreglunni á höfuðborgarsvæðinu voru sendir á vettvang til rannsóknar. Niðurstöðu er að vænta í næstu viku að sögn lögreglumanns á Borgarnesi.