TR og Akureyri með bestu vefina

Vefur Tryggingastofnunar ríkisins var kjörinn besti ríkisvefurinn og vefur Akureyrarbæjar var valinn besti sveitarfélagavefurinn þegar viðurkenningar fyrir bestu opinberu vefina voru veittar í dag.

Í umsögn dómnefndar um vef Tryggingastofnunar segir að vefurinn geymi gríðarlegt magn upplýsinga sem settar eru fram á skýran og aðgengilegan hátt. Yfirlit á forsíðu sé mjög skýrt og vel uppsett svo notendum vefsins veitist auðvelt að finna svör við spurningum sínum í öllum málaflokkum. Verkfæri vefsins séu einföld í notkun. Útlit vefsins sé stílhreint og myndvinnsla vel útfærð með hverjum málaflokki. Viðmótið sé hlýlegt og mannlegt.

Um vef Akureyrarbæjar segir að aðgengi upplýsinga sé til fyrirmyndar. Forsíða gefi gott yfirlit um innihald hans og uppsetning sé skýr og skilmerkileg. Leitarniðurstöður séu sérlega skipulega framsettar. Vefurinn sé vel tengdur við aðra starfsemi í bænum sem auki gildi hans verulega. Þá segir að útlitshönnun vefsinjs sé nýstárleg, stílhrein, skipulögð og einstakelga falleg. Samspil mynda og efnisflokks sé mjög vel unnið. Viðmót vefsins sé hlýlegt og þægilegt.

Það var Ögmundur Jónasson innanríkisráðherra sem afhenti verðlaunin.