Var hótað með eigin haglabyssu

Ríkissaksóknari hefur ákært tvo menn, Snorra Sturluson og Daniel Arciszewski, fyrir hrottalegt rán og frelsissviptingu í Breiðholti í júlí síðastliðnum.

Samkvæmt ákæruskjali réðust mennirnir inn til rúmlega sextugs manns í Krummahólum klukkan þrjú um nótt, héldu honum þar nauðugum til ellefu um morgun og beittu hann allan tímann ofbeldi og hótuðu honum lífláti. Í ákærunni segir að þeir hafi bundið hann með límbandi við stól í stofu íbúðarinnar, beint haglabyssu í eigu húsráðandans að höfði hans og skipað honum að skrifa undir skjal þess efnis að hann skuldaði mönnunum peninga. Þeir hafi jafnframt bundið hann á höndum og fótum ofan í baðkari með rafmagnssnúru sem fest var við blöndunartæki, troðið tusku upp í hann og límt fyrir.

Nokkru síðar hafi þeir neytt hann til að gefa upp PIN-kóða á debetkorti, tekið út 20 þúsund krónur og látið hann millifæra 435 þúsund krónur á reikning annars þeirra. Þeir rændu líka af honum sjónvarpi, tölvuskjá, kassettutæki, ullarteppi og seðlaveski. Þolandi árásarinnar gerir 3,2 milljóna króna skaðabótakröfu á hendur ræningjunum, sem eru 43 og 33 ára. Þeir hafa sætt gæsluvarðhaldi síðan málið kom upp.- sh