Sjónvarpsfólk sagt tengjast píramídafyrirtæki sem varað er við á netinu

Sjónvarpsfólkið Ásgeir Kolbeinsson og Ragnheiður Guðfinna Guðnadóttir eru sögð tengjast nokkurskonar píramídafyrirtæki sem nefnist WorldVenture. Fréttatíminn greinir frá því í blaðinu sínu sem kemur út á morgun að um ferðaklúbb sé að ræða. Fyrirbærið sé þó áþekkt Herbalife og NuSkin. Eini munurinn er sá að varan eru ferðalög.

Rætt er við forkólf fyrirtækisins sem vill ekki koma fram undir nafni en hann segir það ekki samræmast stefnu fyrirtækisins. Hann útskýrir fyrirkomulagið þannig að meðlimir fái afslátt af gistingu. Um er að ræða afslátt frá 15 prósentum upp í 70 prósent.

Hægt er að skoða Facebook-síðu klúbbsins en það er maður sem heitir Heiðar Guðnason sem heldur henni úti.

Á Facebook-síðunni er tilboðið auglýst svona:

„Með því að gerast meðlimur, færðu aðgang að orlofspökkum sem innihalda fjögurra- eða fimmstjörnu áfangastaði en borgar verð er jafnast á við það sem þú myndir greiða fyrir tveggja- eða þriggja stjörnu áfangastaði."

Og svo:

„Engu er til sparað hvað varðar þægindi og þjónustu hvað varðar upplifun orlofs. Hér má finna það besta er varðar hughrif og slökun. Meðlimir njóta forréttinda hvað varðar aðgang að einstökum áfangastöðum á heimsvísu, allt á verði sem er aðeins brot af því sem aðrir myndu greiða."

Tilgangur fyrirtækisins virðist vera að safna félögum fyrst og fremst en ársgjaldið eru hundrað þúsund krónur. Svo eru vörur seldar sem og auðvitað ferðalög. En sérstaklega er tekið fram að flug er ekki ein af vörunum sem verslað er með.

Athygli vekur að ef nafni fyrirtækisins er slegið inn í leitarvélina Google.is má finna fjölda ásakana um að fyrirtæki sé lítið annað en svindl. Þá er er raunar einnig hægt að finna Youtube-myndbönd þar sem því er haldið fram að fyrirtækið sé ekki einhverskonar svikamylla.

Samkvæmt Fréttatímanum er stefnt að því að fyrirtækið verði orðið starfhæft hér á landi 1. nóvember næstkomandi.

Hvorki náðist í Ásgeir Kolbeinsson né Ragnheiði Guðfinnu vegna málsins. Í umfjöllun Fréttatímans kemur fram að Ásgeir og Ragnheiður hafi verið orðuð við  sölukynningar um ferðaklúbbinn og eiga að vera efst í píramídanum.

Hægt er að lesa Fréttatímann hér.